​​Улаан-Үдын «Пионер» кинотеатрта харуулагдаһан Баир Дышеновэй «Шарнохой» гэһэн кино олониие хүлгөөбэ

Декабриин 12-һоо Улаан-Үдымнай “Пионер” кинотеатрта мэдээжэ найруулагша Баир Дышеновэй “Шарнохой” гэһэн фильм олондо харуулагдажа эхилээд, наһатайшье, залуушье зониие хүлгөөбэ.

Баир Дышеновэй һанамжаар, хэн нэгэнэй хэһэн нүгэл заяандаашье миин ошодоггүй, долоон үедэ доло хүрэхэ!

“Сын за отца не отвечает” гэжэ Сталин багшамнай хэлэһэн аад лэ, зэмэтэй ба зэмэгүйшүүл булта хохидоо бэлэй. Энээнһээ удхатай – эхэ эсэгэһээ байха, элинсэг хулинсагай нүгэл үри үхибүүдтэнь сэхэ тудана.

Энээниие зүб гэжэ һанабашье, бөө мүргэлые болон тэрэ һүрөөтэ жэлнүүдтэ үйлэдэгдэһэн бузар хэрэгүүдые бултанда харуулһанай хэрэгтэй юм гү гэһэн асуудал гараад лэ ерэнэ.

Харин кино тухай хэлэхэдэ, хаа-яаниинь һүртэй хүгтэй, али нэгэндээ айхабтар уянгатай хүгжэмынь харагшадай сэдьхэл хүлгөөнэ. Мүнөө сагай туйлалта юм ааб даа. Харин харуулагдаһан даншье һаа шэрүүн хатуу аашанууд үнгэрүүгээр харуулагдаа гү даа. Тиибэшье иимэ ушарнуудһаа байха, үшөөшье һүрөөтэй үйлэ хэрэгүүд тэрэ үедэ шуһа нүжэтэйгөөр үйлэдэгдэһэн юм даа...

Буряад киномнай һаял байгуулагдажа, хүл дээрээ гаража ядажа байна ха юм даа. Тиимэһээ хараал, үреэл табингүйгөөр аятайханаар хаража, эльгэ зүрхэндөө хадуужа, зүрхэ сэдьхэлээрээ бодожо үзэе.