​​Хүдөөгэй ажалшадта – шэнэ техникэ

Эрхүү можын хүдөөгэй ажахынуудта “Агростартап” урилдаануудай дүнгүүдээр мүнгэн дэмжэлтэ үгтэхэ болоо.

Усть-Ордын Буряадай тойрогһоо 2019 ондо байгуулагдаһан юһэн ажахы грантнуудые шүүгээ. Алайр аймагай Мира Нагаслаева, Баяндайн аймагай Кузьма Убугунов, Бооханай аймагай Александр Тапханаков болон Алексей Григорьев, Оһын аймагһаа эгээл олон зон: Ольга Андреева, Анастасия Халтанова, Евгения Хамаганова, Наталья Балдаева болон Юрий Бондарев гэгшэд илагшадай тоодо ороо. Тэдэнэр ажахыдаа хэрэглэхэ оньһон техникэ худалдан абахаяа 2 сая түхэриг Эрхүү можын сан жасаһаа абаха болобо.

Энэ мүнгэн туһаламжа гүрэнэй зүгһөө дэмжэлтэ үзүүлхэ шэнэ “Агростартап” гэһэн шэглэлээр үгтэхэ юм. Энэ шэглэлые “Фермернүүдые дэмжэхэ болон хүдөөгэй коопераци хүгжөөхэ” гэһэн федеральна түсэлөөр регионой хүдөө ажахын яаман бэелүүлнэ.

Энэ хэрэгтэ 32 сая түхэриг шэглүүлэгдэнэ. Ехэнхи хубинь – 30 сая 700 мянган түхэриг федеральна сан жасаһаа, харин 1 сая 300 мянганиинь региональна сан жасаһаа үгтэхөөр хараалаатай.