​​Дахинаа баярлуулба

Газарай хара тоһо (нефть) малтажа гаргадаг гүрэнүүдэй тамиршадай дунда уласхоорондын мүрысөөн Ханты-Мансийска тойрогто түгэсэбэ. Буряадай тамиршад нэгэ алтан, нэгэ мүнгэн медальнуудта хүртөө.

Дэлхэйн Кубогта хүртэхын түлөө мүрысөөн энэ хэмжээ ябуулгаар һүүлэй жэлнүүдтэ һэлгэгдэжэ, һонирхол татама ехэ тулалдаануудай нэгэн болоо бшуу. Тиимэһээ эндэ түрүү тамиршад ринг дээрэ гарахаяа оролдонод. Мүнөө жэл Ханты-Мансийскын тойрогой Белоярск һуурин 23 гүрэнэй боксёрнууд ерээ.

Буряадай эхэнэрнүүд Ородой суглуулагдамал командын бүридэлдэ оруулагдажа, һайн дүнгүүдые харуулһан байна.

60 килограмм хүрэтэр шэгнүүртэ Наталья Шадрина Венесуэлэ, Таджикистан болон Греци гүрэнүүдэй тамиршадые шүүжэ, чемпионой нэрэ зэргэдэ хүртөө.

69 килограммай шэгнүүртэ Дарима Сандакова Беларусь болон Армени гүрэнүүдэй тамиршадые илаад, финальна уулзалгада Ородой суглуулагдамал командын бүридэлдэ оруулагдаһан Крымэй түлөөлэгшэ Галина Головченкодо шүүгдээ. Тиигэжэ Дарима хоёрдохи һуурида гараа.

Наталья болон Дарима хоёр “Номто” гэһэн тамирай клубай шабинар юм гээд һануулая.

Ородой суглуулагдамал командын бүридэлдэ ородог тамиршадай хэр зэргэ харюусалгата мүрысөөнүүдтэ бэлдэжэ байһыень эдэ тулалдаанууд харуулаа. Февраль һарада үшөө нэгэ томо мүрысөөндэ бултадаа хабаадаха юм. Эдэл тэмсээнүүдтэ шалгарһан тамиршад Ородой суглуулагдамал командын бүридэлдэ оруулагдажа, март һарада Олимпиадада шэлэн абалгын шатада хабаадаха эрхэдэ хүртэхэ.

“ЮграМегаСпорт” сайтын зураг