1502
Буряад Уласай Толгойлогшо Алексей Цыденов Хүүгэдэй клиническэ больницын эмшэн-педиатр Екатерина Хамаевна Цыденешеевада «Ородой Холбоото Уласай габьяата эмшэн» нэрэ зэргын үнэмшэлгэ барюулаа.
Шэлэһэн ажалдаа үнэн сэхээр хандаһанайнгаа түлөө Екатерина Хамаевна 2006 ондо «Жэлэй эмшэн» гэһэн нэрэ зэргэдэ хүртэһэн юм. Энэ шагналда эгээ түрүүн Леонид Рошаль хүртэһэн юм гээд тэмдэглэлтэй. Удаань 2007 ондо Екатерина Цыденешеева Сибириин федеарльна тойрогой «Люди дела» гэһэн мүрысөөндэ түрүүлээ.
Хэжэ байһан ажалдаа үнэн сэхээр хандадаг эмшэнэй шагналнуудай саана үдэр бүриин нэтэрүү ажал, сагаан сэдьхэл, туһа хүргэһэн мянгаад гэр бүлэнүүд. Мүнөөшье хүрэтэр Ярууна, Хэжэнгэ аймагуудта Екатерина Цыденешеевае дулааханаар дурсажа байдаг.
Үндэр нэрэ зэргэдэ хүртэһэн Екатерина Цыденешеева иигэжэ хэлэнэ: “Бидэнэй гарта эгээл сэнтэй - үхибүүднай. Тиимэһээ харюусалгань тон ехэ. Энэ үндэр нэрэ зэргэ хадаа ганса минии ажалай үрэ дүн бэшэ, харин Буряадай эмшэдэй ажалай сэгнэлтэ болоно. Суг хүдэлжэ байһан нүхэдтөө баяраа мэдүүлжэ, үхибүүдэй элүүр энхэ ябахын тула хэдэг ажалдатнай амжалта хүсэнэб. Теэдшье манай үхибүүд элүүр энхэ ябаг лэ даа!”
Буряад уласай элүүрые хамгаалгын яаманай мэдээсэлэй албанай гэрэл зураг
