945
Буряад Уласай Толгойлогшо Алексей Цыденовэй хүтэлбэри доро аяншалга хүгжөөхэ талаар зүблэлдэ аяншалгын ажал ябуулха зохих оршон байгуулха асуудалнуудаар хэлсэбэ.
Буряад уласай аяншалгын яаманай мэдэсэлээр, 2019 ондо 380 мянган шахуу хүн можо нютагаар яабаһан байна, 2018 ондо - 371,26 мянган хүн. Харин 2009 онһоо 2018 хүрэтэр аяншалагшадай тоо 50 хубяар дээшэлээ.
- Мүнөө уласай аяншалгын һалбарида 29 туроператор, 78 турагентство, 407 хамтын байрлаха газарнууд хүдэлнэ. 2019 ондо бүхы зошод буудалнууд заатагүй классификаци гараха гэһэн эрилтэ табигдаа. Тиигэжэ хамтын байрлаха 38 газар болон 21 зошод буудал энэ эрилтэ дүүргээ, - гэжэ Буряад уласай аяншалгын яаманай сайдай орлогшо Баярма Цыдыпова хэлэбэ.
2019 ондо түлбэритэ туһаламжа үзүүлһэнэй ашаар 3,25 миллиард түхэриг ороһон байна. Тиихэдэ Байгал шадарай нютагуудта хангалгын байгууламжа хүгжэнги бэшэ, тиимэһээ аяншалга хүгжөөхэнь хүшэр гэжэ Буряадай худалдаанай-үйлэдбэриин танхимай аяншылгын һалбарида олзын хэрэг эрхилхэ талаар хорооной хүтэлбэрилэгшэ Марина Бутюгова тэмдэглэбэ.
- Байгал далайн эрье шадарай һууринуудта шиидхэхэ асуудалнууд олон. Байгша ондо Максимиха хүрэтэр харгы хэгдээ, аяншалагшад олоор ябажа эхилхэ. Харин энэ һууринда гэрэлтүүлгэ үгы, хүнүүдэй харгы гараха ябаган зүргэнүүд, уһаар хангалга үгы, - гэжэ Марина Бутюгова онсолбо.
Алексей Цыденов олзын хэрэг эрхилэгшэдтэ аймагуудай захиргаануудтай хамта аяншалгын газарнуудые болбосоруулгада хабаадахыень уряалба. Байгалай эрьедэ аяншалагшадай тогтодог һууринуудта хүдөө нютагуудай хүгжэлтын программа байгуулха гэһэн даалгабари аяншалгын яаманда үгтэбэ.
Буряад уласай аяншалгын яаманай сайд Мария Бадмацыренова 2020 ондо зүблэлэй ябуулха ажалай түсэбтэй танилсуулаа. Тэрэнэй ёһоор, круизна аяншалга хүгжөөхэ, соёлой болон түүхын хүшөөнүүдые аяншалгын һалбарида шэглүүлхэ талаар болон бусад ажалнууд хэгдэхэ.
Буряад Уласай Засагай газарай мэдээсэлэй албанай гэрэл зураг
