1334
Шэнэ жэлэй урдахана Буряадай арадай ирагуу найрагша Галина БАЗАРЖАПОВАГАЙ уран зохёол дэлгэрүүлхэ шэнжэтэй “Миралзаа мүшэд” гэһэн ном “НоваПринт” хэблэлээр “нара хараба”. Буряадай Уран зохёолшодой холбооной 85 жэлэй ойдо, “Буряад үнэн” сониной 100 жэлэй ойдо зорюулагдаа.
Г-Н. Гунзыновтай Хоца Намсараев тухай «Абгатанайм алтан сэржэм» гэһэн хөөрэлдөөнһөө һабагша татан, энэ ном эхилнэ. Шираб Нимбуев, Чимит Цыдендамбаев, Гунга Чимитов, Африкан Бальбуров, Владимир Петонов, Дондок Улзытуев, Цырендулма Дондогой, Матвей Осодоев, Александр Жамбалдоржиев, Дулгар Доржиева, Доржи Сультимов, Вера Токтохоева, Цыбикжаб Найданов, Батор Тумунов, Николай Бадмаринчинов – эдэ зоной зохёохы ажал ябуулгые олон гэршэнэрэй, өөрынгөө харааһаа удхалан, ухамайлан бэшээ.
“Буряад үнэн” сониной, “Байгал” сэтгүүлэй одото үе тухай дурдалганууд, Буряадай уран зохёолой аймагуудтахи эблэлнүүд тухай хөөрөөн һонирхолтой.
Монголой суута ирагуу найрагша Ринчинэй Чойномой, хүүгэдэй уран зохёолшоГомбын Ганболдын болон “Ород Уласай олон хэлэтэ уянга” гэһэн ниитэ гаршагтай оршуулганууд онсо.
Мүнөө дээрээ – дүрөө дээрээ...
Нэгэ хүсэл шуналаар хүтэлэгдэн ябаһан бэшээшэ зоноо дурдан нэрлэбэ. Хүн бүхэниинь миралзаа мүшэдэй гэрэл мэтэ замбиин нюусые бэедээ шэнгээн, залгаа зохёолнууд болгон баглаалжа, өөр өөрынгөө мандалаа үргэнэ.
Миралзаа мүшэдэй урасхал бүри ялагар тодо боложо, бүри хүсэжэн, хурсадажа байхань болтогой!
Рыгзема Батомункуева
