1174
“Залуушуулай шэнэ зүйл нэбтэрүүлгын кампус” гэһэн түсэлэй нээлгын баяр ёһололой үедэ
Байгша ондо нэмэлтэ болбосоролой «Эдельвейс» түб Ородой Холбоото Уласай Гэгээрэлэй яаманай 8 сая 460 мянган түхэригэй грантда хүртэжэ, “Залуушуулай шэнэ зүйл нэбтэрүүлгын кампус” гэһэн түсэлөөр амжалтатай ажал ябуулаа. Тиигэжэ хүүгэдые дэлхэйн ерээдүйн хүгжэлтын шэглэлнүүдтэй, Улаан-Үдэ хотын ажалай дэлгүүрэй болон ниигэмэй эрилтэнүүдтэй холбон хүмүүжүүлхэ, болбосоруулха, хүгжөөхэ зорилго бэелүүлэгдэнэ. Мүн тиихэдэ ургажа ябаа үетэндэ хэрэгтэй дадал шадабаринуудые олгохоһоо гадна элдэб янзын ажахынуудтай харилсаатайгаар хүдэлгэдэг юм. Тиигэжэ «Эдельвейсын» шабинар инженернэ болбосорол, IT-оньһон гэхэ мэтын мүнөө үеын түрүү шэглэлнүүдээр мэдэсэ шадабаринуудтай болоно, элдэб янзын шэнжэлгэнүүдые хэнэ, түсэлнүүдые бэелүүлнэ.
Илангаяа бүлэгөөрөө хүдэлжэ, хүн бүхэн өөрын шэглэлээр тон харюусалгатайгаар ажалаа ябуулжа, зондо хэрэгтэй, аша туһатай түсэлнүүдые бэелүүлжэ һураа. Жэшээнь, хэн нэгэн 3D-хэбүүдые һайнаар хэжэ шадаха, нүгөөдэнь программа зохёохо бэлигтэй. Тиин һурган хүмүүжүүлэгшэд үхибүүдтэ ганса гансаараа бэшэ, харин бултанайнгаа арга шадал элсүүлэн, хүсэеэ нэгэдүүлэн хүдэлхэдэ, ехэ амжалта туйлагдадаг гэжэ бодото хэрэг дээрэ ойлгуулхаяа оролдоо юм. Эндэ хажуу тээһээ мэргэжэлтэд, сэгнэн шэнжэгшэд хабаадуулагдажа, үхибүүдтэ ажалдань туһалаа.
Түсэлэй бэелүүлэгдэһэн хойно хэр мэдэсэ шадабаритай, бүлэгөөр хүдэлхэ дүй дүршэлтэй болоһыень зорюута шалгадаг байгаа. Үхибүүд өөһэдөөшье ажалайнгаа дүн согсолоо. Тиин шэнэ оньһон арга зүйнүүдые хэрэглэхэ гэбэл, гүнзэгы, үргэн мэдэсэ хэрэгтэй гэжэ ойлгоо.
«Эдельвейс» түбэй багшанар
Кампусай онсо шэнжэ гэхэдэ, хүүгэдэй бүлгэм түсэл дээрэ хүдэлхэдөө, ямар нэгэн бодото ажахын захил бүтээнэ. Энэнь ехэ удха шанартай: тэдэ бодото хэрэг бэелүүлжэ болон бүлэгөөрөө хүдэлжэ һурана, алдуунуудаа оложо заһана, хэлсэһэн болзор сахиха дүрим ойлгоно, харюусалгатай болоно, түсэлэй бюджет гэжэ мэдэнэ. Зүгөөр гол шухалань гэхэдэ, ямаршье түсэл хүн зондо туһатай, хэрэгтэй байха ёһотой гэжэ хадуужа абана.
Һурган хүмүүжүүлэгшэд зорюута элдэб янзын бэрхэшээлтэй байдалнуудые тогтоогоод, үхибүүд ямар аргаар гарасалданаб гэжэ шэнжэлээ. Хэрбээ ядалдаа һаань, юундэ һанаһандаа хүрөөгүйб, ямар алдуу гаргааб гэжэ ойлгуулжа үгэдэг байгаа. Гадна түсэлдэ хабаадахаһаа урид ямар мэдэсэ шадабаритай һэн бэ, ажалаа дүүргээд, ямар мэдэсэ шадабаринуудтай болооб гэжэ бүридхэжэ байгаа.
Ирина Басхаевагай дурадхаһан гэрэл зурагууд
Ирина БАСХАЕВА, нэмэлтэ болбосоролой «Эдельвейс» түбэй захирал
