1477
2019 ондо «Буряад уласта буряад хэлэ сахин хүгжөөлгэ» гэһэн гүрэнэй программын хэмжээндэ Буряадай гүрэнэй архив хуушан монгол хэлээр бэшэгдэһэн архивай дансануудые олондо харуулха зорилготой тэдэниие бэдэржэ, оршуулжа, электронно бааза байгуулха талаар ажал ябуулба.
Буряад уласай гүрэнэй архивай жасын шэнжэлгэнүүдэй дүнгүүдээр, «Сэлэнгын Дүүмын» 6 525 дансануудые оршуулха талаар ажал хэгдээ. Эдэ хадаа 1825-1903 онуудай Сэлэнгын Дүүмын ажалай дүнгүүд болоно.Эдэ дансануудта Дүүмын ажалай жэлэй дүнгүүд, һуурижаһан, нүүдэл буряадуудай, эрэшүүл, эхэнэрнүүдэй тоо бүридэл, мал ажахын байдал, яса суглуулга тухай; ажалшадай, наһа бараһан хүнүүд болон нарай хүүгэд тухай мэдээсэл ороһон байна. Мүнөө Сэлэнгын Дүүмын дансануудай 170 хуудаһан мүнөөнэй буряад хэлэндэ оршуулагдаа.
Буряад уласай гүрэнэй архивай электронно баазада һонирхолтой дансанууд оруулагданхай. Угайнгаа һарбаалжан мэдэхэеэ хүсэһэн хүнүүдтэ, хизаар ороноо болон түүхэ шэнжэлэгшэдэй һонирхол тус дансанууд татаха байха. Эдэ дансануудтай танилсаха гэбэл, Буряадай гүрэнэй архивай сайт болон WWW.SOYOL.RU гэһэн порталда орохо арга бии.
Буряад Уласай соёлой яаманай мэдээсэлэй албанай гэрэл зураг
