Бөө мүргэлэй «Тэнгэри» бүлгэмэй ударидагша, заарин бөө Баир Цырендоржиев эдэ үдэрнүүдтэ албан хэрэгээр Африка гүрэндэ ябажа байнхай.
- Баир Цырендоржиев хани нүхэртэеэ, Берлинһээ Габриель болон Мария Шетчель гэгшэд Баруун Африкын Того гэжэ гүрэнэй Ага-Уа тосхоной ажаһуугшадай, мүн тэндэхи «Вуду-Приста» гэһэн мүргэлшэдэй эмхиин түрүүлэгшэ Месингын урилгаар хүрэжэ ошоо, - гээд «Тэнгэри» бүлгэмэй мэдээсэлэй албанай мэргэжэлтэн Оксана Ким дуулгана. Тэндэ Баир Жамбалович шажанай талаар хуралдаанда хабаадаха.
Тэндэхи арад зон айлшадые һайнаар угтажа абаад, тэрэ дороо өөрынгөө бургомистр гэхэ гү, али хотын түрүүлэгшэтэеэ уулзалга үнгэргэһэн байна. Удаань заарин бөө Баир Цырендоржиев, Габриель, Мария Шетчель гэгшэд үргэл хэжэ, оршон тойронхи хада уулын эзэдые хүндэлөө.
- Үргэл хэһэнэйнь удаа аалихан һэбшээн бодожо, нютагай зониие ехэтэ гайхуулаа. Тэрэ дулаан орондо һэбшээлхэ гээшэ тон хоморой байгаалиин үзэгдэл юм, энэнь байгаалиин эзэд баярлажа байһанайнь тэмдэг болоно, - гээд, Оксана Ким нэмэнэ.
Энэ Того Уласта урданайнгаа мүргэл сахидаг юм байна, тэрэнь вуду гээд нэрлэгдэнэ. Африкын зарим нютагуудта энэ мүргэл заншалта болгогдожо, гүрэнэй талаһаа харгалзалгатай. Баир Жамбалович тэндэ 20 гаран шүтөөндэ хүрэхэ, томо үргэлнүүдтэ хабаадаха гэжэ “Тэнгэри” бүлгэмэй мэдээсэлэй албан дуулгана.
vk.com/Баир Цырендоржиев