​75 жэлэй ойдо – 75 мянган түхэриг

Агуу Илалтын 75 жэлэй ойтой дашарамдуулан, Эсэгэ ороноо хамгаалгын Агууехэ дайнай ветерануудта гүрэнһөө 75 мянган түхэриг үгтэхэ.

Энэ баярта мэдээсэл Владимир Путин Ленинградые хамгаалалгын Гүрэнэй мемориальна музейдэ Эсэгын дайнай ветерануудтай болон олониитын түлөөлэгшэдтэй уулзахадаа мэдүүлээ.

- Ерэхэ ехэ ойн баярай хэмжээ ябуулганууд можо хизаар бүхэндэ үнгэргэгдэхэдөө, ветерануудые дэмжэлгэдэ гол анхарал хандуулагдаха, - гэжэ Юрэнхылэгшэ элирхэйлээ. - Нэн түрүүн залуушуулда этигэнэб. Бэлигтэй бэрхэ хүбүүд, басагад алишье талаһаань ветерануудые дэмжэжэ шададаг.

Федеральна хэмжээнүүд хэдэн жэл удаа дараалан үнгэргэгдэнэ: ветерануудые болон тэдээндэ адли эрхэтэйшүүлые, ара талын ажалшадые дэмжэжэ, ветерануудта - 10 мянган түхэриг, ара талынхидта - табан мянган түхэриг түлэгдэнэ гээд һануулая.

Буряадтамнай 2019 оной һүүл багаар 227 ветеран, Ленинградай бүһэлэлтэдэ байһан 13 хүн, 5025 ара талын ветеран, фашизмын баряанда багадаа байһан 21 хүн ажаһууна.