Буряад Уласай Засагай газарай мэдээсэлэй албанай гэрэл зураг
Буряад уласай Мухар-Шэбэр аймагай Цолга болон Гашей нютагуудта Ородой Холбоото Уласай Юрынхылэгшын грантын хүсөөр «Гэр бүлын «Урлагша» экостуди» гэһэн түсэл бэелүүлэгдэжэ эхилбэ. Эдэ нютагуудай ажаһуугшад буряад соёлоор һонирхожо, гараар урлажа, модоор дархалха аргатай болобо.
- Уласай олониитын «Хранители Байкала» гэһэн хүдэлөөн юрэнхылэгшын грант шүүһэн байна. Энэ түсэл Мухар-Шэбэр аймагай Цолга болон Гашей нютагуудта бэелүүлэгдэнэ. Тус экостуди эдиршүүл модоор дархалжа, оёжо һураха, тиихэдэ экологиин асуудалнуудаар мэдэсэтэй болохо. Тусхай тоног хэрэгсэлнүүд худалдан абтагдажа, январь һараһаа һуралсал эхилһэн байна. Тиихэдэ гансашье үхибүүд бэшэ, харин томошуулшье энэ түсэлөөр һонирхоно, - гэжэ Буряад Уласай соёлой яаманай сайд Соёлма Дагаева хэлэбэ.
Буряад Уласай Засагай газарай мэдээсэлэй албанай гэрэл зураг
«Гэр бүлын «Урлагша» экостуди» гэһэн түсэл бэелүүлгэдэ «Хранители Байкала» гэһэн эмхи федеральна бюджетһээ нэгэ саяһаа дээшэ түхэриг абаһан байна. Мүнөө оёдолой табан машина, модоор урлаха табан станок болон оёхо, урлаха хэрэгсэлнүүд абтанхай.
Улаан-Үдэһөө 100 модоной зайда оршодог Цолга нютагта 700-һаа дээшэ хүн ажаһуудагшье һаа, соёлой байшангүй юм. Һургуулида арбаад жэлэй туршада гараар урлаха иимэ хэшээлнүүд үнгэргэгдөөгүй.
Буряад Уласай Засагай газарай мэдээсэлэй албанай гэрэл зураг
- Үхибүүд мүнөө үеын гаджедүүдһаа ехэ дулдыданги болонхой гэжэ мэдээжэ. Тиимэһээ тэдэниие ажал хэжэ һургангаа түрэлхид, томошуултай хамта түсэл бэелүүлнэбди, - гэжэ «Хранители Байкала» хүдэлөөнэй зүблэлэй түрүүлэгшэ Дулма Содномова тэмдэглэнэ.
Тус экостудида хэдэн кружогууд ажалаа ябуулха. Үхибүүд эндэ оёжо, модоор дархалжа һураха юм. Удаань үхибүүдэй бүтээлнүүдэй үзэсхэлэн –яармаг эмхидхэхэр түсэблэгдэнэ.