Буряад Уласай Тарбагатай аймагта «Болбосон түхэлтэй хотын оршон байгуулга», «Аюулгүй, һайн шанартай харгынууд» гэһэн түсэлнүүд бэелүүлэгдэнэ. Эдэ түсэлнүүдэй хэмжээндэ Доодо Саянта болон Тарбагатай нютагуудта харгы заһабарилгада, Эсэгэ ороноо хамгаалагшадай дурасхаалда зорюулагдаһан хүшөө заһабарилгада, парк, сквер болбосон түхэлтэй болголгодо мүнгө һомологдонхой.
Тарбагатай аймагта үндэһэн түсэлнүүд хэр зэргэ бэелүүлэгдэнэб гэжэ Буряад Уласай Арадай Хуралай һунгамал, «Единая Россия» намай Буряадтахи таһагай хүтэлбэрилэгшын уялга саг зуура дүүргэгшэ Батор Цыбиков болон Улаан-Үдын хотын зүблэлэй һунгамал Дмитрий Турченюк гэгшэд шалгаба.
2019 ондо Тарбагатай нютагта Эсэгэ ороноо хамгаалгын Агууехэ дайнай ветерануудта зорюулһан хүшөөгэй сквер болбосон түхэлтэй болголгодо 750500 сая түхэриг һомологдоо. Школьная гудамжада оршодог парк заһабарилгада 247 314,57 түхэриг шэглүүлэгдэһэн байна. Тиигэжэ эдэ газарнуудта һандали, гэрэлтүүлгэ, бог шорой суглуулха урнанууд табигдаа. Тиихэдэ заһабарилгын шухала ажал 2020 ондо хэгдэхэ юм. тиихэдэ байгша ондо Эсэгэ ороноо хамгаалгын Агууехэ дайнай ветерануудта зорюулһан хүшөөгэй сквер заһабарилгада - 600000 түхэриг, парк заһабарилгада 1 342 549,6 түхэрг дамжуулагдаха юм.
Тиихэдэ Доодо Саянтада Эсэгэ ороноо хамгаалагшадай дурасхалда зорюулагдаһан хүшөө заһабарилагдаа. Тарбагатай нютагта Молодёжная гудамжада оршодог гэр шадарай талмай болбосон түхэлтэй болгогдоо.
- Тарбагатай аймагаар ябахадаа, заһабарилгын ажал һайн шанартайгаар хэгдээ гэжэ хараабди. Олониитын хинамжа шухала, - гээд Батор Цыбиков хэлэбэ.
Анна Огороднигой гэрэл зураг