​​Онтохоной ороноор

Түнхэнэй түб тосхондо оршодог «Солнышко» сэсэрлигтэ хүлгөөтэй байба. Аймагай 13 сэсэрлигэй үхибүүд эндэ сугларжа, «Театральна уулзалганууд» гэhэн урилдаанда бэлиг талаангаа, шадабарияа харуулжа, онтохоной ороноор аяншалжа, амжалтануудые туйлаа.

Ямар сэсэрлиг буряад хэлэеэ сахинаб, тиихэдээ үхибүүдээ бага наhанhаань түрэлхи хэлэндэнь hургаха талаар ямар ажал ябуулнаб гэжэ ойлгуулаа.

Харбяангуудай «Сэсэг» сэсэрлиг - «Репкэ», Толтын сэсэрлиг - «Нохой хүн хоёр», Хужарай сэсэрлиг - «Тэхэ Бабанын түүхэ», Далахайн сэсэрлиг - «Тэхэ бабанын түүхэ», Таhархайн сэсэрлиг - «Шандаганай гэр», Тоорын сэсэрлиг - «Будамшуу» гэжэ онтохонуудые харуулаа. «Хүн нохой хоёр» гэжэ зүжэг харуулһан «Солнышко» сэсэрлиг илагшадай тоодо ороо. Охор-Шэбэрэй сэсэрлиг - «Будамшуу», Аршаанай «Ручеек» сэсэрлиг - «Ажалша тоншуул» гэжэ зүжэгүүдые харуулаад, тус тустаа шагналнуудта хүртөө. Жэмhэгэй сэсэрлигэй эдир актёр Ардан Батлаев, Шулуутын hургуули-сэсэрлигэй Гарма Шенхоров, Галбын сэсэрлигэй Ирина Манзаракшеева гэгшэд онсо шалгараа. Шэмхын сэсэрлиг «Арбан хоёр жэл» гэжэ зүжэгтөө «Эрхим афиша» бэлдэһэн байна.

Энэ урилдаан харагшадые ехэтэ баярлуулаа. Хүмүүжүүлэгшэдэй ударидалга доро үхибүүд эхэ хэлэеэ эрхимээр шудална гэжэ элирээ. Эхэ орондоо дуратай, түрэhэн нютагтаа туhатай бэрхэ үхибүүд урган гараһай гээд, аймагай сэсэрлигүүдые ударидагша Надежда Николаевна Усольцева энэ хэмжээ ябуулгын түгэсхэлдэ хүсэһэн байна.

Любовь АЮШЕЕВА, Түнхэнэй аймагай болбосоролой хэлтэсэй методист