1085
Февралиин 1-дэ Ородой Холбоото Уласай можо нютагуудта «Алас Дурнын гектар»гэһэн программын бэелүүлэгдэжэ эхилһэн сагһаа хойшо гурбан жэл гүйсэбэ. Энэ болзорто 77,6 мянган хүн газартай болоһон байна. Эгээл ехэ газар Приморско хизаарта – 21 мянганһаа дээшэ хүн абаа, Саха (Яхад) уласта – 13,7 мянган хүн, Хабаровска хизаарта – 12 мянган тухай хүн.
Тиихэдэ Алас Дурна федеральна тойрогой бүридэлдэ нэмэгдэн оруулагдаһан Үбэр Байгалай хизаар болон Буряад уласта энэ программа амжалтатай бэелүүлэгдэнэ. 2019 ондо эдэ можо нютагуудта «Алас Дурнын гектар» гэһэн программа эхилжэ, Буряад улас болон Үбэр Байгалай хизаарта ажаһуудаг хүнүүд газар абаха эрхэтэй болоо. Хахад жэлэй туршада Үбэр Байгалай хизаарта – 2127 хүн, Буряад уласта 1726 хүн газар абаһан байна. Тиихэдэ 2020 оной февралиин 1-һээ эдэ можо нютагуудта Алас Дурнын федеральна тойрогой ажаһуугшад газар абаха эрхэтэй болоо гээд һануулнабди. Байгша оной августын 1-һээ Ородой Холбоото Уласай ажаһуугшад тус программада хабаадаха аргатай.
Хүнүүд ехэнхидээ гэр барихаяа газар абана (54 % ), хүдөө ажахы эрхилхэ зорилготой – 24 %, үмсын ажахы болон саад ургуулхаяа – 7 % хүн газартай болоо.
«Алас Дурнын гектар» гэһэн программада эгээл эдэбхитэйгээр Алас Дурнын федеральна тойрогто ажаһуугшад хабаадана гээд тэмдэглэлтэй. Тиигэбэшье Ород гүрэнэй бусад можо нютагуудай ажаһуугшад энэ программада оролсоно. Бусад можо нютагуудһаа Москвва, Москвагай можо, Санкт-Петербург, Санкт-Петербургын можо, Краснодарска хизаар, Свердловско, Новосибирскэ болон Эрхүү можын ажаһуугшад тус программада хабаадана.
«Алас Дурнын гектар» гэһэн программа саашадаа дэмжэхэбди. Тиихэдэ «Алас Дурнын ипотекэ» газар ашаглалгада туһа болохо. Эдэй засагай Зүүн зүгэй табадахи хуралдаанда Ородой Холбоото Уласай Юрэнхылэгшэ Владимир Владимирович Путин Алас Дурнын федеральна тойрогой ажаһуугшадта хүнгэлэлтэтэй ипотекэ үгэхэ тухай шиидхэбэри абаа һэн. Юрэнхылэгшын энэ даалгабари бэелүүлхэ талаар ажал ябуулнабди. Һара хахадай туршада хүнгэлэтэтэй ипотекэ абаха талаар хүнүүд мэдүүлгэ оруулна», - гэжэ Ородой Холбоото Уласай Засагай газарай Түрүүлэгшын орлогшо – Ородой Холбоото Уласай Юрэнхылэгшын Алас Дурнын федеральна тойрогто бүрин эрхэтэ түлөөлэгшэ Юрий Трутнев тэмдэглэнэ.
«Алас Дурнын гектар» гэһэн программада хабаадагшад тодорхой мэдээсэл абаха гэбэл, 8-800-200-32-51 гэһэн утаһаар түхэреэн үдэрэй туршада хонходохо аргатай.
