988
Үбэр Байгалай хизаарай амбан захирагша Александр Осиповой даабаряар 2030 он болотор хони үдхэлгэдэ 3,5 миллиард түхэриг шэглүүлэгдэхэ түсэл табигдаба. Энэ мүнгэнэй 1,6 миллиарднь федеральна һан жасаһаа үгтэхэ.
- Энэ мүнгэн үүлтэртэ түлгэнүүдые, зайн галай хэрэгсэлнүүдые абалгада, хонишодой байрануудта худагуудые малталгада,шэнэ байрануудые барилгада гаргашалагдаха. Гүрэнэй туһаламжаар Могойтодо хүдөө ажахын логистическэ түб байгуулагдаха. Агын үүлтэр һайжаруулха түб һэргээгдэжэ, нооһо шалгаха уласхоорондын хэмжээнэй лабораториин оньһон хэрэгсэлнүүд абтаха. Залуу хонишодто гүрэнэй тэдхэмжэ үзүүлэгдэхэ, - гэжэ Үбэр Байгалай хизаарай хүдөө ажахын сайд Денис Бочкарёв амбан захирагшада элидхээ.
Эбэртэ бодо мал болон хонин һүрэг ямар талада үдхэхэдэ таарууб гэжэ элирүүлхэ шухала гэжэ Александр Осипов тэмдэглээ.
- Түргэн зуура бүхы хүдөө ажахынуудые шалгажа, хэр ашаг үрэтэйгөөр хүдэлжэ байһыень элирүүлхэ. Хаана муу дүнгүүдтэй байнаб - хүтэлбэрилэгшыень һэлгэхэ. Харин һайн дүнгүүдтэй хүтэлбэрилэгшэдые урмашуулха хэрэгтэй. Багашье, ехэшье ажахынууд юундэ, ямар ушарһаа хонидойнгоо тоо толгой үсөөрүүлнэб, али ямар аргаар олошоруулнаб гэһэн асуулта үнгэргэхэ ёһотойбди, - гэжэ амбан захирагша онсолоо.
Хитад гүрэнтэй зэргэлжэ байһандаа, хонин һүрэг үдхэлгөөр ашаг үрыень хараалха, мүн хүршэ можо, хизаарнуудта наймаа үргэдхэхэ хэмжээ ябуулгануудые эмхидхэхэ гэжэ Александр Осипов заабарилаа.
