Сагаалганай үедэ үнгэргэгдэдэг “Буузын баяр” наадамнай Ородой дэбисхэртэ болодог эдеэ хоолдо зорюулһан түрүү 5 нааданай тоодо орожо шадаба. Энээниие ТурСтат гэһэн аяншалгын портал бүридхэдэг юм.
“Буузын баяр” нааданай зэргэдэ Ижевск хотодо үнгэргэгдэдэг «Всемирный день пельменя», Клинуда «Самоварное настроение», Севастопольдо “Крым на тарелке”, мүн тиихэдэ Калининградта эмхидхэгдэжэ, олон зониие суглуулдаг ута гэгшын колбасагай фестиваль түрүүшүүлэй тоодо оробо.
Хүн зоной һонирхол ехэтэ татадагыень, мүн дабтагдашагүй байһыень ТурСтат эмхиин түлөөлэгшэд хараадаа абан, түрүү табыень элирүүлһэн байна.
“Буузын баяр” гэһэн ээлжээтэ фестиваль байгша оной февраль һарын гарагай 23-да Улаан-Үдын түб талмай дээрэ үнгэрхэ юм. Тэндэ амтан бууза амталха аргатайт, үшөө тиихэдэ үндэһэн буряад наадануудта оролсожо болохо.
Анна Огороднигой гэрэл зураг