Алас Дурные гайхуулаа

Алексей Жилинэй гэрэл зураг

Ушугай хоёр зүйлөөр Алас Дурна зүгэй чемпионат Улаан-Үдэдэ үнгэрһэн амаралтын үдэрнүүдтэ болоһон байна. Эндэ Буряадай тамиршад 200 гаран медаль абажа шадаа.

Амарай можын, Саха-Яхад Уласай, Приморско болон Үбэр Байгалай хизаарнуудай, Буряад Уласай 300 гаран тамиршан наһанай табан бүлэгтэ ушу-таолу болон ушу-кунг-фу зүйлнүүдээр мүрысэбэ.

Алексей Жилинэй гэрэл зураг

Буряад Уласай Арадай Хуралай хорооной түрүүлэгшэ Игорь Марковецэй хэлэһээр, һүүлэй үедэ Алас Дурна зүгэй можо, хизаарнуудта ушу түргөөр хүгжэнэ.

Алексей Жилинэй гэрэл зураг

- 14 жэлэй саанахана бидэ тэндэ ошожо мүрысөө һэмди. Тиихэдэ бидэ ганса Амарай можын тамиршадаар тулалдаабди. Харин мүнөө бүхы регионуудтань ушу нэбтэрүүлэгдэнэ, - гэжэ Игорь Марковец мэдүүлнэ.

Алексей Жилинэй гэрэл зураг

Амарай можын болон Приморско хизаарай командын бүридэлдэ дэлхэйн болон Европын чемпионууд болон шангай һуури эзэлэгшэд Улаан- Үдэдэ ерээ. Хүндэтэ айлшадай тэмдэглэһээр, Буряадай ниислэлдэ ушугаар бэеэ һорилго хэхэдэ, аятай оршон байдал тогтонхой. 2019 оной һүүл багаар үүдэеэ сэлиһэн ушугай шэнэ спортын танхим руу ороһон Алас Дурнын айлшад ехэ гайхажа, гэртээ бусаа. Заримашуулынь Улаан-Үдэ ерэжэ, Буряадай тамиршадтай хамта һорилго хэхэеэ бэлэн байһанаа мэдүүлээ.

Алексей Жилинэй гэрэл зураг

Ушу-кунг-фугаар Ородой чемпионат наһанай баһа табан бүлэгтэ үнгэргэгдэхэ. Тус хэмжээ ябуулга мартын эхеэр болохоор хараалагдана. Мүн ушу-таолугой мүрысөөн мартын һүүл багаар эмхидхэгдэхэ. Эдэ тэмсээнүүдтэ шалгарһан тамиршадай урда Европын чемпионадта ошохо харгы нээгдэхэ.