​​Сагаалганай найрта буужа ерыт бултадаа

Кремльдэ сагаалхамнай гээд, Буряадаймнай түрүү дуушад, хатаршад, зүжэгшэд Москва зоришоходонь, хэниие хаража хужарлахамнай гээшэб гэжэ һанаагаа зобоһон зон бии ёһотой.

Тиигэжэ шэнын 1-дэ Улаан-Үдэ хотын ФСК-гай ордон соо болохо найрта Москваһаа “Намгар” гэһэн этно-бүлгэм, Эрхүүһээ “SHONO” гэһэн этно-рок- хамталиг, Үбэр Байгалай хизаарһаа “Амар сайн” театр, мүн Монгол оронһоо Жаргалсайханай Чингис дуушан ба “NUANS” хамталиг хабаадахань.

Гадна һаяхана байгуулагдаһан морин хууршадай ансамбль, П.И. Чайковскиин нэрэмжэтэ Урлалай колледжын дууша оюутад болон багшанар, Галсан-Нимын Гандиг, Арюна Нимаева, Арюухан Будаева, Хэжэнгын алдар суута “Үетэн” бүлгэм, Буряад театрай зүжэгшэд-“хүгшэд” Лосолма Протасова ба Ольга Ломбоева-Ранжилова гэгшэд сугларагшадые абьяас бэлигээрээ баясуулха.

Февралиин 24-дэ үдэрэй 13 сагһаа ФСК-гай фойе соо уран зурагай, алта мүнгэн бүтээлнүүдэй үзэсхэлэн, үндэһэн маягаар хэгдэһэн дурасхаалай зүйлнүүдэй болон номуудай худалдаан эмхидхэгдэхэ. Мүн 15 сагта эхилхэ һайндэрэй тоглолтын үедэ “Уран хэлэтэнэй урилдаан” гэһэн Интернет-мүрысөөндэ илагшадта шангуудые барюулгын баяр ёһолол үнгэрхэ.

Анна Огороднигой гэрэл зураг