850
Холо оршодог фермерскэ ажахынуудта туһаламжа хүргэхэ талаар заншалта түсэл Буряад Уласай Захаамин аймагта үнгэргэгдэбэ. Гурбан үдэрэй туршада ажалай бүлэг 19 ажахыда хүрэһэн байна. Эдэ уулзалгануудай ашаар, хүдөө ажахы эрхилэгшэдэй һанаа зобооһон асуудалнууд элирүүлэгдэдэг гээд тэмдэглэлтэй.
Иимэ уулзалганууд ехэ удха шанартай гэжэ фермернүүд тэмдэглэнэ. Шара-Азарга һууринай Хэлтэгэй гэһэн газарта һарлагуудые үсхэбэрилжэ туршаһан, мүнөө буряад үүлтэрэй адуу үсхэбэрилдэг Николай Будуевай хэлэһээр, эдэ уулзалганууд заншалта болоо. Хүдөө ажахы эрхилэгшэд тоглолто хаража, эмшэдтэ бэеэ шалгуулһан байна.
Хүдөө ажахынуудта аймагай захиргаанай мэргэжэлтэд, тэрэ тоодо, эмшэд, малай эмшэд, ойн ажахын түлөөлэгшэд хүрэжэ, фермернүүдэй асуудалнуудые шиидхэнэ.
Захаамин аймагай һунгамалнуудай зүблэлэй түрүүлэгшэ Людмила Санжеевагай тэмдэглэһээр, Захаамин аймагта малшадай 500-һаа дээшэ гүүртэнүүд бии, тэдэ холо, хүрэжэ ядахаар газарта оршодог.
- Заншалта ёһоор, ажахынуудта хүрэхэдөө, аймагай соёлой байшанай хүдэлмэрилэгшэд тоглолто харуулдаг, - гэжэ Людмила Санжиева хэлэнэ.
Байгша ондо тэдэнэр «Соёл» гэһэн үндэһэн түсэлэй хэмжээндэ абтаһан нүүдэл автоклубаар ерэһэн байна гээд тэмдэглэлтэй.
