​һэргэг байя!

Коронавирусай һүжэрэлгэдэ эсэргүүсэхэ талаар Ородой Холбоото Уласай Гүрэнэй зүблэлэй ажалай бүлгэм байгуулха тухай захиралта мартын 15-да Владимир Путин гаргаба. Ородой Засагай газарай Түрүүлэгшын хэдэн орлогшонорһоо, сайдуудһаа болон бусад үндэр тушаалтанһаа – хамта дээрээ 19 хүнһөө бүридэһэн энэ бүлгэмые Москва хотын мэр Сергей Собянин толгойлбо.

Эгээл Москвада мүнөө дээрээ тон олон үбшэнтэн элирүүлэгдэнхэй. Мартын 17-ой байдалаар коронавирус халдаһан 53 хүн тэндэ бүридхэгдэжэ байгаа. Харин гүрэн дотор бүхыдөө 93 хүндэ энэ үбшэн элирүүлэгдээ, тэдэнэй 4-иинь эдэгээ, үшөө 79 хүн эмшэлүүлэгдэжэ байна. Энээн тухай үсэгэлдэр Ородой Засагай газарай Түрүүлэгшын орлогшо Татьяна Голикова мэдээсэхэдээ: «Үбшэлһэн хүнүүдэй 7-иинь лэ гүрэн дотороо байгаад, хариһаа ерэһэн зонтой харилсажа халдаа», - гэжэ тодорхойлоо.

Мартын 17-ой байдалаар Буряад Уласта коронавирус нэгэшье хүндэ элирүүлэгдээгүй. Энээн тухай уласай Элүүрые хамгаалгын яаман мэдээсэнэ. Гэхэ зуура хари гүрэнһөө ерэһэн зониие шалгаха талаар арга хэмжээнүүд саг үргэлжэ абтажа байнхай. Тэдэниие эмшэд гэр дээрэнь үзэнэ.

Харин мартын 16-да Улаан-Үдын 6-дахи поликлиникэдэ хүлгөөн болобо. Хоолойгоо үбдөөд, эмшэдтэ хандаһан нэгэ хүн һаяхана Урда Солонгосһоо ерэһэн байшоо бшуу. Тиимэһээ эрилтын ёһоор үнөөхи эмнэлгын газар саг зуура «бүһэлэлтэдэ» орожо, тэндэ байһан бүхы хүнүүд бүридхэгдэжэ, ажаглалтада абтаба. Харин хоолойгоо үбдөөд хандаһан үнөөхи хүн шалгагдажа байна. Хэрбэеэ үнэхөөрөө коронавирус халдаһан байгаа һаань, поликлиникэдэ байгша бүхы хүнүүд мүн лэ тусгаарлагдаха юм ха.

-Урда Солонгосһоо ерэһэн найман хүн, мүн Хитадай хоёр эрхэтэн мүнөө дээрээ ажаглалта доро байна, - гээд, Буряадай Элүүрые хамгаалгын яаман мэдээсэхэ зуураа, - Коронавируста эсэргүүсэхэ талаар эмшэдэй һуралсал саг үргэлжэ хэгдэнэ, эмнэлгын газарнуудые тусхай хэрэгсэлнүүдээр хангаха ажал ябуулагдана, - гэжэ тэмдэглэнэ.

Мартын 12-ой байдалаар Ород гүрэндэ 28 хүндэ коронавирус элирүүлэгдэһэн байгаа һаань, табан хоногой туршада үшөө 70-аад хүн халдаа. Мүнөө дээрээ Буряад Уласта үбшэнтэн бүридхэгдөөгүйшье һаань, хүршэ Үбэр Байгалай хизаарта нэгэ хүндэ коронавирус элирүүлэгдэнхэй гэжэ тэмдэглэлтэй. Тиимэһээ һэргэг байя!