​Аха захатанай жэшээ

Геннадий Мармушев ба Цырен Чирнинов 

Пензэ хотодо аха захатанай дунда хүнгэн атлетикээр Ородой чемпионат һаяхана үнгэргэгдэбэ. Буряадай тамиршад тэндэ олоороо хабаадаһан байна. Цырен Чирнинов болон Геннадий Мармушев хоёр эгээл һайн дүнгүүдые харуулаа. 

Ветерануудай дунда мүрысөөндэ 500 гаран тамиршадай хабаадаһаниинь һайшаалтай. Заншалта ёһоороо залуу ветеранууд 35 наһатайһаа эхилнэ. Мүн 70 наһаяа дабаһан ветерануудшье мүрысөө. 

Геннадий Петрович Мармушев эгээл үндэр наһатай тамиршадай дунда хабаадаа. Буряадтаа мэдээжэ энэ тамиршан хоёр медаль абажа шадаһан байна. 1500 метрэй зайе 5 минута 48 секунда соо гаталжа, чемпионой нэрэ зэргэдэ хүртөө. 3000 метр зайда Геннадий Мармушев баһа түрүүлжэ шадаа. Тэрэ 12 минута 3 секунда соо гүйжэ гараһан байна. 

Цырен Зориктуевич Чирнинов шангай III һуури эзэлээ. 800 метр зайда 2 минута 30 секундын дүн харуулаад, хүрэл медальда хүртөө. 1500 метр зайда IV һуурида гараа. Буряадай бусад тамиршад шангай һууринуудые эзэлжэ шадаагүй.

Борис Балдановай гэрэл зураг