​Ариг сэбэрые сахижа...

Коронавирусһаа һэргылхэ талаар арга хэмжээнүүд удаа дараалан абтаһаар. Тиигэжэ мүнөөдэрһөө эхилжэ, Улаан-Үдын үйлсэ, гудамжануудые тусхай машинануудай ашаар хорото бодосуудые усадхадаг уһа сасажа арилгаха ажал ябуулагдахань. Олон зоной суглардаг газарнууд, ниитын тээбэриин буудалнуудта нэн түрүүн арилгагдаха.

Улаан-Үдын Болбосон түхэлэй талаар комбинадай 4 авто-унаа энэ хэрэгтэ хабаадуулагдаха юм ха. Үшөө тиихэдэ һая худалдан абтаһан 2 машинашье оролсохо.

- Бүхы юумэн хуу бэлэн, машинанууд ГИБДД-дэ бүридхэлдэ абтанхай, мэргэжэлтэд хамгаалгын тусхай хубсаһа үмдөөд хүдэлхэ. Томо техникын орожо шадахагүй газараар ябаган зон хамһалсажа, гараараа сэбэрлэлгын уһа сасаха. Энэ хэрэгтэ нюргандаа үргэбшэлхэ 14 хэрэгсэл худалдан абтанхай, - гээд, Улаан-Үдын Болбосон түхэлэй талаар комбинадай мэргэжэлтэд мэдээсэнэ. 

Энэ муухай үбшэнэй тарахагүйн тула арад зон зүбөөр ойлгожо, амин шухала хэрэгтэй бэшэ болбол гэрһээ гарангүй һуухыень Засагай газарай түлөөлэгшэд дахин-дахин уряална.

Улаан-Үдын Захиргаанай дурадхаһан гэрэл зураг