​Эли болоhон шэнэ болзор

Бүхэдэлхэйн тамиршадай, спортдо дуратайшуулай, бүгэдэ ажаһуугшадай эгээл дуратай нааданууд 2021 оной июлиин 23-һаа августын 8 болотор үнгэргэгдэхэ гэжэ Уласхоорондын олимпиин хороон (МОК) мэдүүлбэ. Паралимпиин нааданууд 2021 оной августын 24-һөө сентябриин 5 хүрэтэр болохо гээд түсэблэгдөө.

Японой ниислэл Токио хотодо мүнөө жэл Олимпиада болохо байгаа гээд һануулая. МОК-ой Юрэнхылэгшэ Томас Бах наадануудай хуби заяан дүрбэн долоон хоногой хугасаада эли болохо гэжэ үшөө мартын 23-да мэдүүлээ һэн. Харин үглөөдэрынь Японой премьер-министр Синдзо Абэтай телефоноор хөөрэлдэжэ, Олимпиадын болзор һэлгэхэ тухай дуулгаа.

- COVID-19 гэһэн халдабарита хүндэ үбшэнһөө тэрэ болотор һалаха бэзэбди. Үшөө тиихэдэ бүхы тамиршадай һайнаар бэлдэлгэ гарахын тула хэдэн саг үгтэнэ, - гэжэ Уласхоорондын олимпиин хорооной мэдээсэлдэ тэмдэглэгдэнэ. Энэ ушараар спортын зүйлэй федерацинууд өөһэдынгөө түсэбүүдые хэжэ эхилхэнь. Боксын уласхоорондын федерациин (AIBA) хүтэлбэрилэгшын уялгануудые дүүргэгшэ Мохамед Мустасанай хэлэһээр, тэдэ нэн түрүүн шэнээр олимпиин хорооной гэшүүн болохоёо оролдолго гаргаха. Ушар гэхэдэ, 2019 ондо (AIBA) энэ хороонһоо гаргагдаа бэлэй. 

Үшөө 2013 ондо барилдаа Олимпиин наадануудай бүридэлһөө болюулха тухай ябадал хэгдээ һэн. Тон ехэ оролдолгын ашаар үлөөжэ шадаа бэлэй. Мүнөө үедэ Ородой Барилдаанай федераци Ородой Спортын яамантай болон Уласхоорондын барилдаанай нэгэдэлтэй (UWW) хамта жэлэй түсэб табижа эхилээ. Энээн тухай Ородой Барилдаанай федерациин хүтэлбэрилэгшын орлогшо Георгий Брюсов мэдүүлээ. 

- Эрэшүүлэй дунда Ородой чемпионат УлаанҮдэдөө үнгэргэгдэхэ. Мүн эхэнэрнүүд Казаньда сугларха. Оршон байдалые хараадаа абан, болзорыень табихабди, - гэжэ Георгий Брюсов хэлэнэ. Һур харбаашад бүхы мүрысөөнүүдээ июниин 30 болотор тогтоогоо. Хэмжээ ябуулгануудайнгаа шэнэ болзорые хэзээ хэжэ эхилхэнь бэ гэжэ үшөө мэдэгдэнэгүй.