​Талаан ехэтэ табан тамиршан

Александр Богомоев, Арсалан Будажапов

Буряадай табан барилдаашан бүхэдэлхэйн барилдаашадай рейтингдэ эрхим 20 тамиршанай тоодо оролсоо. Эдэ хэд бэ гэбэл, Александр Богомоев, Балдан Цыжипов, Арсалан Будажапов, Стальвира Оршуш болон Мария Кузнецова болоно.

Уласхоорондын барилдаанай нэгэдэл (UWW) һара бүхэндэ рейтинг бүридүүлэн толилдог заншалтай. Дэлхэйе бүһэлһэн муухай халдабарита коронавирус үбшэнһөө боложо, энэ заншал таһалдахань гээшэ. Юуб гэхэдэ, һара бүри үнгэргэгдэжэ байдаг барилдаанай уласхоорондын 4-5 мүрысөөн болюулагдаа. Тиимэһээ тоолохо юумэн үгы байха бшуу. 

Һүүлшын рейтинг апрель һарын эхиндэ толилогдожо, 2020 оной түрүүшын гурбан һарын дүнгүүдые согсолно гээшэ. Ехэнхи шэгнүүрнүүдтэ 2019 оной дэлхэйн чемпионадта эрхимлэһэн барилдаашад түрүү һууринуудые эзэлнэ. Олимпиин наадануудай барилдаанай программада ородоггүй 61 килограмм хүрэтэр шэгнүүртэ Александр Богомоев 9-дэхи һуури эзэлнэ. 

Мүнөө жэл тэрэ Иван Ярыгинай мүнхэ дурасхаалай уласхоорондын мүрысөөн болон Европын чемпионадта түрүү һуури эзэлһэн байна. Эдэ амжалтануудай удаа тэрэ эрхимүүдэй тоодо орожо шадаа. 

Европын чемпионадай финалда Александр Богомоевто шүүгдэһэн дэлхэйн чемпион Бека Ломтадзе тус рейтингдэ түрүү һуурияа алдаагүй.

125 килограмм хүрэтэр шэгнүүртэ Буряадай бүхэ Балдан Цыжипов эрхим 20 тамиршанай тоодо ороһон байна. Мүнөө тэрэ 19-дэхи һуурида гаранхай. Һүүлэй хахад жэлдэ Балдан ялас гэмэ дүнгүүдые харуулна. Иван Ярыгинай дурасхаалай уласхоорондын мүрысөөндэ тэрэ чемпион болоо һэн. Мүн Европын чемпионадай хибэс дээрэ анха түрүүшынхиеэ гарабашье, шангай III һуури эзэлжэ шадаа. 

Кыргызстанай түлөө барилдадаг Арсалан Будажапов баһа эрхимүүдэй тоодо оронхой. 79 килограмм хүрэтэр шэгнүүртэ Арсалан 13-дахи һуури эзэлнэ. Мүнөө жэлдэ Буряадай барилдаашан Азиин чемпионадта түрүүлжэ гараа. 

Эхэнэр барилдаашадай дунда Буряад Уласые түлөөлдэг хоёр тамиршан дэлхэйн рейтингдэ 13- дахи һууринуудые эзэлнэ. 53 килограмм хүрэтэр шэгнүүртэ Стальвира Оршуш бүридэлдэ оронхой. Һүүлэй үедэ Стальвира һайн дүнгүүдые харуулнагүй гээд хэлэбэл, алдуу болохогүй. 2019 оной сентябрь һарада болоһон дэлхэйн чемпионадта тэрэ Олимпиадада ошохо эрхэдэ хүртэжэ шадаагүй һэн. Мүн 2020 оной эхиндэ Италида болоһон уласхоорондын мүрысөөндэ III һуурида гараа. Мүн Европын чемпионадта баһа хүрэл медальда хүртөө. Харин урдахи хоёр Европын чемпионадуудта тэрэ түрүүлһэн байна. 

Чуваш Уласһаа гарбалтай Мария Кузнецова 65 килограмм хүрэтэр шэгнүүртэ 13-дахи һуурида гаранхай. Буряадай мэдээжэ һоригшо Цыденжап Гулгенов энэ басагые һоридог гээшэ. 

Энэ рейтингдэ Монгол ороной эрэшүүл болон 8 эхэнэрнүүд оронхой. Тэдэнэй табаниинь эрхим 10- ай тоодо тоологдоно.

Эрэшүүлэй дунда габьяата тамиршан Эрдэнэбат Бөхбаяр (57 килограммай шэгнүүр) болон уласхоорондын классай мастер Төмөр-Очир Тулга (65 килограмм) 10-дахи һууринуудые эзэлнэ. 

Уласхоорондын классай мастер Баатаржав Шоовдор 59 килограммай шэгнүүртэ 5-дахи һуурида гаранхай. 57 килограммда уласхоорондын классай мастер Баттулга Болортуяа 7-дохи һуури эзэлнэ. Монгол ороной Ажалай Герой Соронзонболд Батцэцэг 68 килограммай шэгнүүртэ 8-дахи һуурида ябана. С.Батцэцэг хадаа Олимпиин наадануудта III һуури эзэлһэн намтартай. Хажуугаарнь тэрэ хоёр дахин дэлхэйн чемпион болоһон юм.

Дэлхэй дээрэ тогтонижоруулһан оршон байдалай тогтоогдоходо, уласхоорондын мүрысөөнүүд эхилжэ, рейтинг шэнээр бүридүүлэн толилогдохо.

“Борцы Бурятии” бүлгэмэй зураг