​Нигүүлэсхы сэдьхэлэй уряагаар

«Буддын шажанда һүзэгтэй эхэнэрнүүдэй бүлгэм» гэһэн һайн дуратанай эблэл коронавирус үбшэн тахалай таража байһан сагта хүн зоной хамшагта хүртэхэгүйн түлөө ама хамараа бүглөөд ябаха хэрэгсэлнүүдые (маскануудые) оёжо, миинтээр тараана гэжэ урдахи дугаартаа дуулгаа һэмди. Эмнэлгын газарта, наһатай зоной байрладаг гэртэ, юрэшье зондо энэ һайн дуратанай бүлгэм 12 үдэрэй туршада 12000 маска оёжо тарааһан байна. 

"Буддын шажанда һүзэгтэй эхэнэрнүүдэй бүлгэм" гэһэн олониитын хүдэлөөнэй дали доро 50 хүн сугларжа, арадтаа туһатай хэрэгтэ хабаадажа, өөрынгөө хубита оруулалсаа. Тэдэнэй 40-иинь оёдолшон, 7-иинь жолоошон, 3-иинь эмхидхэн байгуулагша. Теэд эдэ зоной ара таладань байһан гэртэхиниие, туһалагшадыень тоолохо болоо һаа, нигүүлэсхы ажалда хабаадаһан зоной тоо нилээд олон байха. Оёдолшоной гэртэхин бүд эсхэхэһээ эхилээд, бэлэн болоһон маскануудые элюурдэнэ, эбхэнэ. 

- Юуншье һаа, эхи захатай байдаг гээшэ ааб даа. Һайн дуратанай эрхилжэ байһан ажалшье эсэстээ хүрэбэ. «Ажалайнгаа дүүрэхэдэ, нэгэ бага уйдхартай шэнги байна,- гээд, энэ нэгэдэлэй эдэбхитэн Очирма Баганова тэмдэглэнэ.

Тиигэнгүй байха аргагүй, юуб гэхэдэ, эдэнэр ажаллаха үедөө дүтөөр танилсаа, нүхэсөө. Хамшагта үбшэнэй бууража, бүхы юумэнэй байрадаа ороходонь, нюур нюураараа уулзажа танилсахабди, һайнаар хөөрэлдэхэбди гэжэ эдэнэр хэлсээ. 

- Жэшээнь, Мира оёдолшондо эмшэнэй дээдэ һургуулида һурадаг хүбүүниинь туһалалсаа. Харин Арюнын гэр бүлэ хуу бултадаа шахуу хүдэлөө. Сэгнэшэгүй туһа манай жолоошод оруулһан байна. Цыденжап Сультимов эгээл түрүүшүүлэй зэргэдэ ерээ һэн. Тэрэ Ивалга, Аэропорт, Сэлэнгын баруун захада байрладаг ажаһуугшадта бэлэн маскануудые тараадаг байгаа. Тиихэдэ Мария гэжэ нэрэтэй врач-педиатр маанадтай ябалсажа, ажал хэлсэһэн байна. Бидэ тэрэниие эмшэн мэргэжэлтэй гэжэ мэдээшьегүй байгаабди, һүүлдэ ажалдаа гарахадань, эли болоо. "Зоозащитники Бурятии" гэһэн олониитын эмхиин гэшүүд Олеся ба Евгений гэжэ нэрэтэй үбгэ һамган хоёр юрист мэргэжэлтэйнүүд юм. Тэдэ хоёр хэдэн үдэрэй туршада хара һүни болотор хүнэй гэр гэрээр ябажа, маскануудые тараагаа, - гээд, Очирма Кимовна нүхэдэйнгөө ажал тухай хөөрэнэ. 

Нигүүлэсхы сэдьхэл сэдьхэһэн зоной һайгаар 128 470 түхэриг мүнгэн суглараа. Энэ мүнгөөрнь эд хэрэгсэл абтахаһаа гадуур, тоһо түлишэдэ гаргашалагдаа. Арга шадалаараа туһалһан зондо һайниие хүргөөд, доро дохимоор. Эмэй санда маскануудай дууһахада, иимэ һайн дуратанай эмхинүүдэй ашаар хүндэ сагта гарасалдаба гээшэбди. Мүнөөдэрэй байдалаар ама, хамараа бүглэхэ хэрэгсэлнүүдээр балай дуталданагүйбди. 

- Бидэнтэй ажал хэлсэһэн Түмэн ба Светлана Мытыповтэниие дурдаха дуран хүрэнэ. Эдэнэр Железнодорожно район болон Восточный тосхоной ажаһуугшадта маскануудые асаржа үгэдэг байгаа. Түмэн  гартаа ехэ дүйтэй түмэршэ дархан юм. Тэрэ #МаскаДобра гэһэн дурасхаалта энгэрэй тэмдэг зохёогоод, бидэндээ харуулаа. Тэрэнээ өөрынгөө "Энхэ" гэһэн дарха хэдэг гэртээ бүтээгээд, энэ хэмжээ ябуулгада оролсоһон хүн бүхэндэ бэлэглэхэ юм. Үшөө дурдагдаагүй хэды олон зон ажал хэлсээ гээшэб, тэдэнэртээ бултандань баярые хүргэнэбди, - гэжэ Очирма Кимовна хэлэнэ. 

Ямар бэ даа нэгэ хүндэ сагай ерэхэдэ, нэгэмүһэн бодожо эблэрээд, тэрэ бэрхэшээлтэй тэмсэдэг арад байһанаа эдэ зоной жэшээ дээрэ үшөө дахин хараба гээшэбди. СОVID-19 үбшэн манай нютагта һүжэрһөөр, хамшагта хүртэһэн зоной тоо үдэрһөө үдэртэ олон болоһоор. Тиибэ яабашье 17 хүн эмнэлгэ абажа эдэгээд, гэртээ табигдаа. Энэ үбшэнэй "яһа" барихань үшөө үдышэг хэбэртэй.