​Онлайн-тэмсээндэ оройлоо

Буряадай шатаршад Алас Дурна зүгэй мүрысөөндэ гэрһээ гарангүйгөөр шалгараа. Тэдэ түрүүшын онлайн-тэмсээндэ хабаадажа, бэеэ харуулаа. 

Дэлхэй дээрэ һүжэрһэн COVID-19 үбшэндэ тамиршадай дундаһаа эгээл түргөөр шатаршад дадаба гээшэ. Юуб гэхэдэ, хаа-хаанагүй олон тоото шатарай онлайн-мүрысөөнүүд үнгэргэгдэжэ байнхай. Эдэ үдэрнүүдтэ дэлхэйн чемпион Магнус Карлсен өөрын нэрэмжэтэ Magnus Carlsen Invitational мүрысөөндэ найман тамиршаниие уряад, онлайн аргаар тэмсээ эмхидхэнэ. Мүн Алас Дурна зүгэй шатаршад баһа тэмсээнүүдтэ хабаадана.

Зүүн зүгэй 45 шатаршан түрүүшын тулалдаануудта хабаадаһан байна. Түргэн шатарай дүримөөр болоһон тэмсээн 11 шатаһаа бүридөө. 

12 наһа хүрөөдүй шатаршадай дунда түргэн шатараар дэлхэйн чемпион Эрдэм Хубукшанов һүүлшын шата болотор түрүү һуури эзэлхэ аргатай байгаа. Хэды тиигэбэшье тэрэ шангай III һуури эзэлжэ шадаа. 11 шатын удаа Эрдэм 8 очко абаа. 

Мэдээжэ шатаршан, уласхоорондын гроссмейстер Инна Ивахиновагай нэрэмжэтэ шатарай һургуулиин шаби Чындыгыр Тамерлан һүүлшын шатада хахад очко абаа һаа, түрүүлхэ шадалтай байгаа. 11- дэхи шатада Еврейскэ автономно тойрогой тамиршан Олег Рычковто Буряадай шатаршан шүүгдэжэ, IV һуурида гараа. Энэ амжалтын удаа Биробиджанай шатаршан чемпион болоһон байна. 

Эхэнэрнүүдэй дунда 11 наһатай Яна Жапова I һуури эзэлээ. Арадай Хуралай һунгамал Инна Ивахиновагай мэдээсэһээр, Буряадай ниислэлэй бүхы шатаршад һорилгоёо интернет аргаар гарана.

- Skype программын аргаар хэшээлнүүд болоно. Гэрэйнгээ даабари манай үхибүүд элдэб шатарай программанууд соо дүүргэнэ. Тиигэжэ Интернет соо наадануудые үнгэргэнэ, - гэжэ Буряадай Шатарай федерациин хүтэлбэрилэгшэ хөөрэнэ.

Өөрөө Инна Ивахинова социальна сүлжээндэ шатар нааданай хэшээлнүүдые эмхидхэнэ. Шатар наадажа шадахагүй ямаршье хүн урданай нааданай аргануудтай танилсажа, миинтээр һурана.

Борис Балдановай гэрэл зураг