​Буряад Уласта тамирай нааданууд болюулагдаhаар

Коронавирус үбшэнэй һүжэрһэн шалтагаанһаа Буряад Уласта спортын талаар 100 гаран хэмжээ ябуулга сагтаа болобогүй. Энээн тухай Спортын болон залуушуулай бодолгын талаар яаман мэдүүлнэ.

Олон мүрысөөнүүд мүнөө жэлдэ болохогүй. Мүн зарим хэмжээ ябуулгануудай болзор хойшолуулагдаа. Хорюултанууд үргэлжэлһөөр. Тиигэжэ май-июнь һарын хэмжээнүүд болюулагдажа байнхай. “Буряад үнэн” сониной шангуудта хүртэхын түлөө ээлжээтэ хүнгэн атлетикын эстафетэ баһал тиигэбэ. Гадна Хүдөөгэй спортын нааданууд 2020 ондо үнгэргэгдэхэгүй. 

- Мүнөө жэлдэ Хүдөөгэй зунай спортын нааданууд Хэжэнгэ аймагта июниин һүүл багаар эмхидхэгдэхэ байгаа. 2021 ондо тус наадан түсэблэгдэнэ. Хэжэнгэдэл болохо юм. Мүн 2021 ондо хараалагдаһан Үбэлэй спортын нааданууд 2022 ондо болгогдоо. Түсэбэй ёһоор Байгал шадарай аймагта эмхидхэгдэхэ, - гэжэ сайд Вячеслав Дамдинцурунов дуулгана. 

Сентябриин эхиндэ уласай Хүүгэдэй спортын наадануудые Улаан-Үдэ угтан абаха байгаа. Энэшье нааданай болзор хойшолуулагдаа. Һүүлэй мэдээсэлээр, тус хэмжээн 2022 ондо болохоор хараалагдана. Хүүгэдэй нааданууд 2018 ондо Сэлэнгэ аймагта, 2019 ондо Түнхэн аймагта үнгэргэгдөө һэн гээд һануулая.

Гэрэл зураг pixabay.com