2264
Ээлжээтэ удаа шанда хүртэбэ
Нёдондо июнь һарада «Краса Бурятии» гэһэн гуа һайхан басагадай харалга-мүрысөөн үндэр хэмжээндэ эмхидхэгдэһэн байна. Эндэ хабаадагшад бүхы бэлиг шадабарияа, аза талаангаа харуулха гэжэ оролдоо. Гоёор алхалан ябажа, һайхан хоолойгоор дуу гүйсэдхэжэ, уян нугархайгаар бүжэглэжэ, сугларагшадые баярлуулаа. Иимэ найр наада эмхидхэхын түлөө хабаадагшадтай тон бага болзорто дуунай, хатарай багшанар болон бусад мэргэжэлтэд хүдэлөө. Тэдэнэй тоодо Алдар Кынзыбеев оролсоо.
Алдар Кынзыбеев
«Угол зрения» гэжэ мүнөө үеын хатарай театрай болон «Байкал-Идель» һургуулиин 25-тайхан багша Алдар Кынзыбеевтэй хүдэлһэнөө хабаадагшад үни удаан сагта һанаад ябаха аабза. Тэрэ гурбан долоон хоногой хугасаада дангина басагадые аяар табан хатарта һургажа үрдеэ. Хатарай гуримаар арадайнгаа ёһо заншал, удха үзүүрыень харуулаа. Тиихэдээ хабаадагшадай дунда өөрөө гаралсажа, хүн зоной һайшаалда хүртөө.
Зургаатайхан ябахаһаа Алдар хатарта шуналтай болоо. Түнхэнэй Хэрэнэй хүүгэдэй уралигай һургуулиин үүдэ нээжэ ороходонь, багша О.С.Таряшинова угтан абаа һэн. Удангүй тэрэ Улаан-Үдэ ерэжэ, Лариса Сахьянова болон Пётр Абашеевэй нэрэмжэтэ Буряад Уласай хореографическа училищиин оюутан болоо. Хатарай багшанар Л.Г.Мергенева ба С.И. Ремешевский гэгшэд эдир хүбүүд басагадтай үдэр бүри хүдэлжэ, бүхы аза, оньһо шабинартаа дамжуулаа.
Училищи болон колледждо найман жэлэй хугасаада Алдар Кынзыбеев һуража гараа. Тиихэдээ үдэр бүриин һургалгын хүндэ байдалые дабажа шадаа.
«Щелкунчик», «Чиполлино», «Бабочка», «Четыре сезона» гэхэ мэтэ зүжэгүүдтэ хабаадаһан намтартай. Зүжэг бүхэндэ бэлиг шадабарияа мүлижэ, шэлэһэн хүнгэн бэшэ мэргэжэлынь бүри дүтөөр һанагдажа эхилээ.
Сагай хэды бага байбашье элдэб янзын һуралсалай олимпиадануудта, зурагай урилдаа-нуудта, ухаан бодол гүйлгэхэ математикын наадануудта, хатарай мастерклассуудта Алдар оролсожол ябаа. Эстрадна болон шог зугаагай нээмэл фестивалиин «Классика жанра» гэһэн номинацида тусхай шанда хүртэжэ, тус хэмжээ ябуулга үнгэргэһэн мэдээжэ Аркадий Аркановһааай тэрэнээ абаа һэн.
2013 ондо Алдартай хамта найман залуу мэргэжэлтэн һуралсалайнгаа гуламтаһаа ажабайдалай хүнгэн бэшэ харгыда гаража ошоһон юм. Тиихэдэнь Коми Уласай гүрэнэй оперо болон баледэй театр угтан абаба. Иигэжэ Баруунхойто федеральна тойрогой эгээл томо театрта шэнэ амисхал оруулагдаа гэхэдэ, алдуу болохогүй. Юуб гэхэдэ, 2013 оной эхинһээ тус театрай ахамад балетмейстерээр Буряадай АССР-эй болон РСФСР-эй арадай артист Екатерина Самбуева хүдэлжэ эхилһэн байгаа бшуу. Нютагайнгаа мэдээжэ нын найдалые залуу халаан харюулжа шадаа.
«Щелкунчик», «Жизель», «Спящая красавица», «Дон Кихот», «Барышня – крестьянка», «Вальпургиева ночь», «Лебединое озеро», «Приключения Чиполлино», «1000 и одна ночь», «Танцы Pro», «Яг -Морт» гэһэн балетнэ зүжэгүүдтэ Алдар Сыктывкар хотодо хүдэлхэ үедөө наадаһан юм. Мүн Баруунхойто федеральна тойрогой хото городуудаар, нютаг нугануудаар гастрольдо ябажа, нэрьемэ альга ташалганда хүртөө бэлэй. Театрай труппа Германида, Англида зүжэгүүдээ нэгэтэ бэшэ харуулхадань, Алдар ябалсажа, хари гүрэнүүдэй харагшадые баярлуулдаг һэн.
Залуу артист ехэ дуратайгаар элдэб урилдаануудта хабаададаг байгаа, тэрэ тоодо «Зарни Джыджъяс» гэһэн финно-угорско арадуудай соёлой урилдаан, «Сыктывкарса тулыс» («Сыктывкарская весна») гэһэн уласхоорондын оперо болон баледэй фестиваль болон бусад.
Һонирхолтойнь гэхэдэ, Алдар Кынзыбеев сэрэгэй алба гаража үрдеэ. Альтернативна аргаар алба хаагаа. Хажуугаарнь Зүүн Сибириин соёлой дээдэ һургуули дүүргээ.
Түрэл Улаан-Үдэеэ бусаад, «Угол зрения» гэһэн мүнөө үеын хатарай театрта хүдэлжэ эхилээ. Алдар Намсараевич хатар бүхэндэ өөрын онсо маяг оруулжа, олондо һайшаагдадаг бүтээлнүүдые зохёоно. Хипхоп, джаз-модерн, классика, contemporari болон бусад хатарнууд олон юумэндэ һургана.
«Байкал-Идель» хатарай һургуулидашье Алдарай габьяа ехэ, аза талааниинь үндэрөөр сэгнэгдэнэ. 3-18 наһатай 130 гаран шаби дуратай багшатаяа уулзахаяа үдэр бүри шамдана.
2019 оной апрель һарада залуу балетмейстернүүдэй «Престиж» гэһэн регион хоорондын урилдаанда Алдар хабаадаа. Шэтэ, Ангарск, Эрхүү, Улаан-Үдэ хотонуудай 52 залуу мэргэжэлтэн 80 гаран хатар конкурсдо дурадхаа. «Мүнөө үеын хатар» гэһэн шэглэлээр Алдар Кынзыбеев хоёрдохи шатын дипломдо хүртөө.
Ажалайнгаа һүүлээр үдэшэ орой болотор Алдар номуудые уншадаг һайн заншалтай. Тэндэһээл ехэнхи хатарайнгаа бүтээлнүүдтэ ерээдүйн дүрэнүүдые абадаг гү даа гэжэ һанахаар.
Багшын ажалай ветеран, Ород гүрэнэй һуралсалай хүндэтэ хүдэлмэрилэгшэ Нина Намсараевна эжынь хүбүүнэйнгээ амжалтануудаар баясан һуудаг юм. Түүхын багша хүбүүндээ багаһаань хойшо өөрынгөө предмедтэ дура татуулжа шадаа. Түүхын дүрэнүүдые һайнаар мэдэдэг болоһон хүбүүниинь хатарай гуримаар мэдэсэеэ хүн зондо дамжуулна.
Галина ШАХМАЛОВА, хизаар ороноо шэнжэлэгшэ
