​Захааминаархин залитай

Захаамин аймагай һурагшад шатараар бүхэроссиин мүрысөөндэ гэрһээ гарангүй шалгарба. 

Бүхэроссиин шатарай мүрысөөндэ 33 можо, хизаарай 95 команда хабаадаһан байна. Захааминай эдир шатаршад түрүү һуури эзэлхын түлөө 76 командатай хамта “Б” бүлгэмдэ мүрысөө. 

Захааминай хүүгэдэй спортын һургуулиин һоригшо Виктор Бадмажаповай хэлэһээр, команда бүхэндэ гурбан хүбүүд, нэгэ басаган наадаа. 

- 2019 ондо “Сагаан тэргэ” гэһэн бүхэроссиин түсэлэй уласай шатада хабаадаһан шатаршадые наадуулааб. Тиихэдэ бидэ хүдөө нютагуудай тамиршадай дунда түрүү һуури эзэлээбди, - гэжэ Виктор Бадмажапов хөөрэнэ. 

Эдир шатаршад һаяхана онлайн аргаар һорилго хэжэ шадаа. Виктор Юрьевичэй тэмдэглэһээр, энээнһээ боложо, мүрысөөн хүндөөр үнгэрөө.

- Март һарын һүүл багһаа гэр гэртээ һуугаад, шатаршаднай һорилго хэжэ эхилээ. Гэбэшье иимэ аргаар томо мүрысөөндэ хабаадахабди гэжэ һанаагүй. Үхибүүдэй эгээл унтаха үедэ мүрысөөн эхиеэ абаа. Манай эндэ үдэшын 20 саг боложо байхада, нааданууд захалаа. Нэгэ парти наадахын түлөө оройдоол гурбан минута үгтөө. 22 час болоогүй байхада, бидэ илалта туйлаад байгаабди, - гэжэ һоригшо хөөрөөгөө үргэлжэлүүлнэ. 

Тус мүрысөөндэ Захааминай шатаршад Санкт-Петербург, Абакан, Ханты-Мансийск, Москва, Лысьва (Пермиин хизаар), Ростов-на-Дону болон Богучаны хотонуудай тамиршадые шүүгээ. Екатеринбургын үхибүүдээр анамана тэмсээ. Ганса Ростов можын Сальск нютагай тамиршадта шүүгдэшөө. Хэды тиигэбэшье чемпионой нэрэ зэргэдэ хүртөө. II һуурида Курганай шатаршад гараа. Шангай III һуури Сальскын үхибүүд эзэлээ. 

Түрүү һуури эзэлһэн командын түлөө Закаменск хотын 1-дэхи дунда һургуулиин шабинар наадаһан байна. Эдэ хэд бэ гэбэл, Ошор Будаев (9- дэхи класс), Роман Цыреторов (9-дэхи класс), Максар Шагдуров (8-дахи класс) болон Сойжина Мункуева (9-дэхи класс) гэгшэд болоно. 

Өөрынгөө хюлгэ дээрэ Максар Шагдуров абажа боломоор 9 очкогой 8,5 очко абаад эрхимлээ. 

Авторай гэрэл зураг