​Арад зоноо аршалан хамгаалха

Россиин Юрэнхылэгшэ Владимир Путин майн 11- дэ гүрэнэйнгөө эрхэтэдые болон эдэй засаг дэмжэлгэдэ зорюулагдаһан зүблөөн дээрэ дэмжэлгын шэнэ хэмжээнүүдэй абтаха тухай мэдээсээ. 

Хүүгэдтэй гэр бүлэнүүдтэ 

3-15 наһатай үхибүүдтэй бүхы гэр бүлэнүүдтэ, олзо оршынь хэмжээнһээ илгаагүй, үхибүүн бүхэндэнь 10-10 мянган түхэриг түлэгдэхэ. Энэ хадаа нэгэл дахин үзүүлэгдэхэ тэдхэмжэ болоно. Бүхыдөө энэ дэмжэлгэ гүрэнэймнай 27 сая хүүгэдтэ үзүүлэгдэхэ.

“Мүнөө хүнүүд элдэб янзын справка, саарһа гуурһа һанажа байнагүй. Тиимэһээ энэ түлбэридэ хүртэхын тула эрилтэнүүд табигданагүй. Иимэ дэмжэлгэдэ хэрэгтэй бүхы гэр бүлэнүүдтэ мүнгэн түлэгдэхэ ёһотой”, - гэжэ Юрэнхылэгшэ онсолон тэмдэглээ. 

Гадна зөөри багатай гэжэ тогтоогдоһон гэр бүлэнүүдэй 3-7 наһатай үхибүүдтэ хараалагдаһан мүнгэ түлэжэ эхилхэ болзор һара урид болгогдобо: июлиин 1-һээ һаа, мүнөө июниин 1-һээ түлэжэ захалха. Буряад Уласта энэ түлбэри 6032 түхэриг болоно. Хэрбээ гэр бүлэ 3-7 наһатай хэдэн хүүгэдтэй һаа, үхибүүн бүхэндөө 6 гарые абаха юм. Тиихэлээрээ тус тэдхэмжэ байгша оной эхинһээ үзүүлэгдэхээр хараалагданхай хадаа, июнь соо нэгэ доро 6 һарын түлөө 36 мянга гаран түхэриг түлэгдэхэ. 

Тиихэдэ 0-3 наһатай багашуулда хараалагдаһан һара бүриин 5 мянган түхэриг имагтал “Эхын мүнгэндэ” (материнский капитал) хүртэхэ эрхэтэй гэр бүлэнүүдтэ түлэгдэхэ ёһотой байһан һаа, мүнөө иимэ наһанай хүүгэдтэй бүхы гэр бүлэнүүд гурбан һарын (апрель, май, июнь) туршада энэ дэмжэлгэдэ хүртэлсэхэ болобо. 

“Байгша оной январиин 1-һээ урид гэхэ гү, али “Эхын мүнгэн” дэмжэлгын үзүүлэгдэхэ шэнэ гуримай хүсэндөө ороодүй байхада, үхибүүтэй болоһон гэр бүлэнүүд эндэ хабаатай”, - гэжэ Владимир Путин тодорхойлоо.

Мүн лэ Юрэнхылэгшын дурадхалаар, ажалгүй эжынэрэй хүүгэдэйнгөө 3 наһатай болотор абадаг тэдхэмжын тон бага хэмжээн хоёр дахин дээшэлхэ: 3375 түхэригэй орондо 6751 түхэриг түлэгдэхэ. 

Ниигэмэй хүдэлмэрилэгшэдтэ – нэмэлтэ түлбэри

“Наһатай зоной гэрнүүдэй, интернадуудай хүдэлмэридэ онсо анхарал хандуулха шухала. Тэндэ ажаһуудаг үбгэд хүгшэдэй хойноһоо илангаяа мүнөө сагта жэншэдгүй һайнаар хараха хэрэгтэй: олонхинь ужаһан үбшэнүүдтэй, һула бэетэй. Тиимэһээ ниигэмэй эмхи зургаануудай хүдэлмэрилэгшэдэй ажал бүри орёо, хүндэ болоно”, - гэжэ Владимир Владимирович хэлээ. 

Ушар тиимэһээ апрелиин 15-һаа июниин 15 болотор хугасаада ниигэмэй эмхи зургаануудай эмшэдтэ хоёр долоон хоногой халаанай түлөө 40 мянган түхэриг, харин коронавирусаар үбдэһэн хүнүүдтэй сэхэ харилсаатайгаар ажалладагуудтань 60 мянган түхэриг хараалагдана. Ниигэмэй болон багшын ажалай хүдэлмэрилэгшэдтэ, эмшэлэлгын дунда бүлэгэй болон захиргаанай ажалшадта 25 мянган түхэриг, харин үбшэнтэнтэй харилсаатайгаар хүдэлһэнүүдтэнь 35 мянган түхэриг түлэгдэхэ. Тэрэшэлэн эмшэлэлгын доодо бүлэгэй хүдэлмэрилэгшэд 15 мянган болон 20 мянган түхэриг, техническэ ажалшад 10 мянган болон 15 мянган түхэриг абаха юм.

Мүн аргын газарнуудай эмшэдэй үри хаагдаха. Гадна майн 9-эй байдалаар, коронавирусаар үбдэһэн хүнүүдтэй сэхэ харилсаатайгаар хүдэлдэг эмшэдтэ болон түргэн туһаламжын жолоошодто хараалагдаһан түлбэринүүд гүрэнэй оройдоол 56 можо нютагта гүйсэд бэелүүлэгдэнхэй. “Даб дээрээ 56000 хүн дэмжэлгэ мүнгэ абаһан байна. Энэнь иимэ түлбэринүүдтэ хүртэхэ ёһотой эмшэлэлгын бүхы хүдэлмэрилэгшэдэй хахадһаань бага хубинь болоно”, - гэжэ Владимир Путин хэлээ. 

Тиин Юрэнхылэгшэ Россиин можо нютагуудай хүтэлбэрилэгшэдтэ майн 15 болотор энэ байдал заһаруулжа, бүхы эмшэдтэ апрелиин түлбэринүүдые хүргэжэ үгэхыень даалгаа. 

Олзын хэрэг эрхилэгшэдтэ 

Эндэ ямар шэнэ дэмжэлгэнүүд хараалагданаб гэхэдэ, нэн түрүүн ажалаар хангаха хэрэгтэ туһа болохо урьһаламжын тусхай программа болоно. 

Тэрэнэй ёһоор, коронавирустай холбоотой хизаарлалтын хэмжээнүүдһээ доройтоһон һалбаринуудай предприятинуудта болон ниигэмэй шэглэлтэй аралжаа наймаанай бэшэ эмхинүүдтэ ажалшадайнгаа салин түлэхын тула 2 хуби түрэсэтэй урьһаламжа абаха арга олгогдобо. Тус урьһаламжа ажалшадайнь тооһоо болон салин түлбэриин тон бага хэмжээнһээ дулдыдажа, зургаан һарын салин түлбэридэ хүрэхөөр тоологдохо. Һара бүхэндэ ганса түрэсэнь бусаагдаха, зүгөөр урьһаламжаяа гүйсэд бусааха болзор – 2021 оной апрелиин 1. 

Тиихэлээрээ урьһаламжын программын хүсэндөө байһан хугасаада ажалшадайнгаа тоо 90 хубиһаа доошо бэшэ хэмжээндэ үлээжэ шадаһан предприятиин урьһалжа абаһан мүнгэншье, түрэсэньшье бюджедэй ашаар хаагдаха. Хэрбээ 80 хубиин хэмжээндэ үлээжэ шадабалнь, тус хүнгэлэлтэ урьһаламжын болон түрэсын тэн хахадтань хабаатай байха.

Владимир Путинай онсолһоор, дэмжэлгын энэ хэмжээнэй ашаар 7 сая хүдэлмэриин һуури хаагдангүй, бүтэн бүлеэн үлэхэ ёһотой. “Эндэ тэмдэглэхэ шухала: бидэ олзын хэрэг эрхилэлгые дэмжэһээрбди, саашадаашье орхихогүйбди. Зүгөөр гол түлэб ажалшадтаа һанаагаа зободог олзын хэрэг эрхилэгшэдтэ энэ хүнгэлэлтэ үзүүлэгдэхэ. Дахин дабтанаб, гүрэнэй дэмжэлгын гол зорилго – ажалшадайнгаа хүдэлмэриин һууринуудые зандань үлээхые болон салин түлбэрииень түлэхые урмашуулга”, - гэжэ Юрэнхылэгшэ ойлгуулаа. 

“Гэртээ һууха” гуримһаа доройтоһон һалбаринуудай бага болон дунда олзын хэрэг эрхилэлгые, мүн тиихэдэ хубиин хэрэг эрхилэгшэдые, ниигэмэй шэглэлтэй аралжаа наймаанай бэшэ эмхинүүдые дэмжэхэ үшөө нэгэ арга – байгша оной апрель, май, июнь һарануудай налог татабари (НДС-һээ гадна) болон даадхалай түлбэринүүдые түлүүлэнгүй болюулха. Тус дэмжэлгэдэ 1,5 сая шахуу предприяти хүртэхэ. 

- Энээнһээ урид предприятинуудай налогой болон даадхалай түлбэринүүдые түлэхэ болзорынь зургаан һараар хойшолуулагдаа һэн. Зүгөөр энээгээр хэрэг бүтэхэгүй. Тиимэһээ шэнэ хүнгэлэлтэ хараалагдаба гээшэ”, - гэжэ Владимир Путин тодорхойлоо.

Россиин 23 можо нютагай өөрыгөө ажалаар хангажа, бүридхэлдэ абтаһан 650 мянган эрхэтэдтэ налог татабариин түлбэринүүдтэ хараалагдаһан дэмжэлгэ мүнгэн (1 МРОТ хэмжээтэй) түлэгдэхэ. Буряад Уласта хубиин хэрэг эрхилэгшэд 2020 оной июлиин 1-һээ “Мой налог” гэһэн федеральна налогово албанай сахим хабсаргалтада бүридхэлдэ абтажа, “Налог на профессиональный доход” гэһэн гуримда орохо аргатай гэжэ һануулая.

- Тон ехээр доройтоһон һалбаринуудта хүдэлдэг хубиин хэрэг эрхилэгшэдтэшье алба налог түлэхэ талаар хүшэр болоһон даашыень хүнгэдхэхэ хэрэгтэй. Байгша ондо тэдэндэ даадхалай түлбэринүүд тушаань салин түлбэриин тон бага хэмжээнэй зэргэдэ налог татабариин мүнгэ бусаахые дурадханаб, - гэжэ гүрэнэй хүтэлбэрилэгшэ мэдүүлээ.

Үшөө нэгэ дэмжэлгэ – олзын хэрэг эрхилэлгые дэмжэхын тула бага урьһаламжануудые үгэдэг можо нютагай эмхинүүдтэ 12 миллиард түхэриг шэглүүлэгдэхэ. Энэнь баһа ехэ туһаламжа боложо үгэхэ. Буряадай Засагай газар апрелиин эсэстэ Уласай бага олзын хэрэг эрхилэлгые дэмжэлгын жасын һомололгые 100 сая түхэригөөр дээшэлүүлээ һэн гэжэ һануулая.

Гэрэл зураг - ТАСС