​Оньhон аргануудые мартахагүйн түлөө

Олондо һайшаагдадаг зүүн зүгэй тулалдаан болохо тайска бокс яагаад гэрһээ эмхидхэгдэнэб гэжэ олон зон гайхажа баранагүй. Харин Буряадай Тайска боксын федераци майн 1-9-эй үдэрнүүдтэ урилдаа үнгэргэжэ шадаа. 

- Тайска боксын тулалдаанууд, үнэхөөрөөшье, ринг дээрэ болодог. Хэдэн мянган жэлдэ хүгжэжэ, ёһо заншалаар аргагүй баян спортын зүйл ха юм. Мүрысөөн хаанашье болобол, заншалнуудыень тамиршад сахидаг гээшэ. Эдэ бүгэдые ойлгохо гэжэ тамиршан бүхэн оролдоно. Булта рингдэ ороходоо, заншалыень харуулан ёһолно ха юм. Эгээл эдэ бүгэдые манай хабаадагшад шүүгшэдтэ видео дээрэ буулгаад эльгээгээ, - гэжэ Тайска боксын федерациин хүтэлбэрилэгшэ, дэлхэйн чемпион Жаргал Очиров ойлгуулна.

Хабаадагша бүхэн тайска боксын эхиндэ гүйсэдхэгдэдэг хатар харуулха байгаа. Удаадахи шатада тайска боксын оньһон аргануудые харуулха даабари тамиршадай урда табигдаа. Илалтын үдэртэ зорюулжа, хабаадагшад хүгжэмтэ номер бэлдэжэ, дуу дуулаа, шүлэг хэлээ, хатарнуудые харуулаа, зурагуудые зураа, гар бэлэгүүдые бүтээгээ. Энэ урилдаан наһанай 3 бүлэгөөр үнгэргэгдэжэ, олоной анхарал татаа. Бүхы шатануудые һайнаар дабажа гарагшад тусхай шангуудта хүртөө. Түрүү һууринуудые өөр өөрын наһанай бүлэгтэ Олеся Герасимова, Юрий Банин, Анастасия Байс, Данил Чебунин, Алина Герасимова гэгшэд эзэлһэн байна. Эгээл багахан хабаадагша Ася Герасимова тусхай бэлэгтэ хүртөө.

Алексей Жилинэй гэрэл зураг