Хабарай саг ерэжэ, хүдөө ажахыда сүлөөгүй халуун хаһа эхилэнхэй. - Хориин аймагай хүдөө ажахын һалбариин ажалшад хабарай тарилгада яһала бэлдэнхэй. Тоһо түлишэ хүрэхэ зэргээр абтанхай, техникэмнай заһабарилга гаранхай. Энэ жэл 250 гектар талмайда таряа тарихаар түсэбтэйбди, 1000 га газарта малай тэжээл болохо “зеленко” тарихабди. Үрэһэн хүсэд үшөө худалдажа абтаагүй, һаяын сагта абахабди. Адуу малнай һайн үбэлжэжэ гаранхай.
Хүдөө ажалшадые дэмжэхын талаар манай аймагай захиргаанай зүгһөө нилээд ажал ябуулагдана. Аймагаймнай 9 ажахы гүрэнэй зүгһөө тусхай программада орожо, 1250 түхэригтэ грантнуудые шүүнхэй. Мүнөө дээрээ тэдэ ажалаа тогтонижоруулжа, харгыдаа оронхой гэхэдэ болохо. Манай талаһаа тэдэндэ тоо бодолгын талаар гү, али малай эмнэлгын талаар туһа хүргэгдэнэ. Хэрэгтэй газартань налогой талаар хүнгэлэлтэ үгэхые оролдонобди, газар арендэдэ үгэнэбди, - гэжэ аймагай захиргаанай хүдөө ажахын таһагые даагша Виктор Хабитуев хөөрэнэ.
Бодото байдалтай танилсаха гэжэ Шубуугүй гэһэн газарта байрладаг “Улзытэ” гэһэн үмсын мал үсхэбэрилдэг ажахыда хүрэбэбди. Добо дээрэһээ тэрэ ажахын байра альган дээрэ шэнги хараатай. Адуу малынь талые бүрхөөжэ харагдаагүйшье һаа, яһала олон толгой хадын хормой доро хабарай хагда дээгүүр бэлшэжэ ябана. Ажахын түрүүлэгшэ Виктор Сампилович Жигжитов ёһотойл газарай эзэн гэхээр олон таба үгэ дуугүйшэг, хорёо хотонь тад-няд заһаатай, хэдэн байранууд, хүдөө ажахын техникэнь урилдаанда энэ гэһээр гарахаяа байһан гүйгөөшэ морид шэнги бэеэ зэһэнхэй зогсонод. Тээ саана барилгашад шэнэ гэр барижа байна.
- Бидэнэр амяараа ажахы боложо гараһаар, арбаад гаран жэл болонхойбди. Нёдондо жэл тусхай программада хабаадажа, нэгэ миллион түхэригэй грант шанда хүртөөбди. Тэрээгээрээ шэнэ МТЗ-82 түхэлэй трактор, тэрээндэ хэрэгтэй бусад техникэ, тэрэ тоодо тармуур, косилка абанхайбди. Иимэ техникэтэй болоо хадаа малай тэжээл тариха түсэб байна. Энэ хэрэгтэмнай аймагай захиргаан газар нэмэжэ үгэхөөр болоо. Мүнөө дээрээ бүхы газарнай 60 га болодог юм. Бидэнэр 60 толгой үхэр мал, 50 толгой адуу баринабди. Энээнэй хажуугаар 4 толгой һарлаг байха, 20 толгой буряад үүлтэрэй хонид, хэдэн гахайнууд, тахяануудшье бии. Һарлагуудые Захааминай аймагһаа асараа һэмди. Үшөө буруун байхадань асарһамнай, тэдэмнай манай үхэр малнуудта дадажа, манайшье мал тэдэндэ һурашанхай. Зундаал халуудадаг, тиигэбэшье бэшэ малаа дахаад лэ бэлшэжэ ябадаг даа, - гэжэ Виктор Сампилович хөөрэнэ. – Бидэ бүхы малаа казах үүлтэрэй улаан үхэрнүүд болгохо һанаатайбди. Тэдэ манай эндэхи уларилда тон һайн таарадаг, найжалхын талааршье бэлэн, хоолоо өөһэдөө бэдэрээд ябашадаг.
Саанахана хорёо соонь гахай наранда игаажа хэбтэнэ, хэдэн тахяанууд сүлөөгүй хоолоо тоншонод. Модо тайрадаг пилорама харагдана, хэдэн тракторнууд жэрысэ табяатай. Соморхон шэнэ гэр бодхоогдожо байна.
- Бидэ мал ажалай хажуугаар морин аяншалга хэхэ һанаатайбди. Энэ талаар программа бэшэжэ, грант шүүгээбди. Аяншалгын зам бэлдэнхэйбди. Мүнөө айлшадые байлгаха энэ шэнэ гэр барижа байнабди. ДЦП, аутизм, яһанай үбшөөр үбшэлһэн үхибүүдые эмнэхэ талаар иппотерапи хэхэ хүсэл байна. Энэ талаар мориднайшье тусхайтаар һургагданхай, номгонууд. Бүхэли үдэр үбшэн зон ганса мориной хажууда байха бэшэ ха юм. Тэдэниие амаруулхын, хоол барихын тула шэнэ байра бэлдэжэ байнабди. Магад, үбшэн зон энэ аргаарнай бэеэ эмнэжэ шадаха бэзэ гэжэ найдагдана. Мүн лэ мори унажа, дүтэ тойронхи байгааляарнай аяншалха аргатайнууд болохо. Эндэхи байгаалиимнай үзэсхэлэн тон гоё юм, шууяагүй, сэбэр агаар, уужам тала, хада гүбээнүүдшье байха. Амараад ошохо зон мүнөөшье бии, - гэжэ Ия Владимировна Баданова хани нүхэрынь хэлэнэ.
- Ажалнай, түсэбүүднай олон. Амяараа энэ ехэ ажал диилэжэ гарахань хүндэшэг, үхибүүднай һургуулиингаа һүүлээр булта туһалдаг. Улаан-Үдэ хотодо ажаһуудаг Баир, Жаргал Долгоржаповтанай гэр бүлэнүүд аргагүй ехэ туһа хүргэдэг. Зэр зэмсэгэй, тоһо түлишын талаар ходо маанадта туһалжа байдаг.
Гүрэнэй зүгһөө нэгэ миллион түхэриг мүнгэнэй хажуугаар аймагай зүгһөө 250 мянган түхэриг байра байдалаа һайжаруулхын талаар үгтэһэн байна. Шэнэ гэр барихадаа, өөһэдын пилорама хэрэглэбэшье, модондо 90 мянган түхэриг гаргашалагдаа, энээнэй хажуугаар барилгашадтаа хүлһыень түлэхэ хэрэгтэй. Гэрэй эзэн өөрөө хара багаһаань адуу малай ажалтай нягта холбоотой юм.
- Бүхы наһамни гүүртэтэй холбоотой, газар дээрээл ажал хэхэ дуратайб, - гэжэ тэрэ хэлэнэ. Виктор Сампилович гүйгөөшэ моридые һоридог, үсхэбэрилдэг. Багаһаань моринтой богони уялаагаар холбоотой юм. Хүлдэ орохоһоонь мори унажа эхилһэн байха гэхэдэ, алдуу болохогүй. Гурбатай бага хүбүүниинь морин дээрэ һайн тогтодог гэжэ эжынь хэлэнэ. Мүнөө дээрээ ажахыдань 9 гүйгөөшэ морид бии. Май һарын һүүл багаар Яруунын аймагта үнгэргэгдэхэ мори урилдаанда бэлдэжэ, моридоо заһажа байна.
-Буденновско үүлтэрэй гүйгөөшэ моридые Агаһаа худалдажа асараа һэмди. Нэгэ мориниинь 150 мянган түхэригтэ юм. Мүнөө мүрысөөндэ бэлдэжэ байнабди. Буряад үүлтэрэй гүйгөөшэд бии. Май һарын һүүл багаар Яруунын аймагта мори урилдаанай жэлэй түрүүшын мүрысөөн болохо. Тэндэ заал һаа, хабаадахабди. Үшөө тиихэдэ зунай хүдөөгэй спортын нааданууд үнгэргэгдэхэ, тэндэ мүн лэ аймагаа түлөөлхэ байхабди, - гэжэ тэрэ омогорхолтой хэлэнэ.
Виктор Жигжитов мори урилдаагаар регионууд хоорондын томонууд мүрысөөнүүдтэ шүүжэ гараһан, үгышье һаа, шангай һуури эзэлһэн байха. Республика дотороо хэдэн урилдаанай урда заха бариһан. 2008 ондо Буряад Республикын Президентын Кубогта хүртэһэн намтартай.
Маанадай ошоходо, гэрэй эзэн үдэр бүриингөө ажал хэхэеэ ёһотойл газарай эзэндэл найдамгайгаар, лаб байса гэшхэлэн ошоно һэн. Энэ хүн түрэл газартаа үндэһөөрөө шэнгэнхэй, хүдөөгэй сэбэр хоншуу агаар амисхал хото городойхитой яажашье һаа һэлгэхэгүй байха. Үхибүүдыньшье түрэл газартаа дуратайгаар, хайра гамтайгаар хүмүүжүүлэгдэнхэй. Ерээдүйн сагта аба, эжыгээ ажахыдаа һэлгэн ерэхэ халаан болохонь лабтай.Лопсон Гергенов
Авторай фото-зураг