Главная / Новости /Материалы проектов / “Хүхюу буряад” конкурсын лауреадууд тодорбо

“Хүхюу буряад” конкурсын лауреадууд тодорбо

21-10-2015

“Буряад үнэндэ” толилогдоһон шог зугаатай, хүхюу хүгтэй зохёолнуудай “Хүхюу буряад” республиканска конкурсын дүнгүүд согсологдобо.

Энэ конкурсдомнай мүнөө жэл үсөөн хүнүүд хабаадаа гэжэ тэмдэглэе. Энэмнай ямар ушарһаа болоо юм даа: мүнөө сагнай ехээр хүхижэ байхаар бэшэ юм гү, тиигээд хүгтэй хүхюутэй ушарнууд үсөөрөө гээшэ гү гэхэдэ, ямаршье сагай шэрүүндэ али олон энеэдэтэй ушарнууд тохёолдодог лэ даа. Али бэшэдэг зомнай үсөөрөө гү? Хай, тиимэшүүл боложо байна хаш даа. Хэды тиигэбэшье, дүнгүүд согсологдожо, илагшад элирүүлэгдэбэ.

“Ябаган шог зугаанууд” номинацида Аршаанай дунда һургуулиин багша Людмила Жалсановагай августын 12-ой  31-дэхи дугаарта толилогдоһон “Ябаган шог зугаанууд” эрхимлээ. Григорий Бубеевич Цыреновэй хөөрөөнүүдһээ үндэһэлэн, сэтгүүлшэ, драматург Цырегма Сампиловагай найруулһан “Домог мэтэ намтар” (№ 34, 2.09) тэмдэглэгдээ. Уран зохёолшо, хүгжэмшэ Владимир Бухаевай (№ 40, 14.10) “Михуулхын хөөрөөнүүдһээ” гэһэн залгаа үгүүлэлнүүд баһал тэмдэглэгдээ. 

Шүлэг зохёолнуудаар Яруунын аймагай Үлзытэ нютагай Ринчин-Доржо Сандановай сентябриин 16-най  36-дахи дугаарта гараһан “Шог”, “Ошохом гэбэ” гэһэн шүлэгүүд арадай гүн сооһоо гараһан гэжэ эрхимлээ. Ирагуу найруулагша, гүн ухаанай эрдэмэй доктор Даша-Дондоп Очировай (№ 32, 19.08) ирагуу найруулгатай, уран нарин, гүн удхатай шог ёгто шүлэгүүд тэмдэглэгдээ.

Эрхимлэгшэдые октябриин 23-да Хоца Намсараевай нэрэмжэтэ, Ажалай Улаан Тугай орденто Буряадай гүрэнэй академическэ драмын театрай тайзан дээрэ амаршалжа, лауреадай дипломуудые, мүнгэн шангуудые барюулха.

 

Сэнгэ РИНЧИНОВ, «Буряад Yнэн»


Теги: конкурс Буряад Yнэн Хухюу буряад



Наши издания