​Жэлэй эрхим тамиршад

Түгэсэжэ байһан 2016 он Буряадай тамиршадта яһала үрэ дүн ехэтэй жэл болобо. Гэбэшье зарим найдалнууд бэелүүлэгдээгүй. Дэлхэйн болон Европын чемпионадуудһаа Буряадай тамиршад 57 медальнуудтай, тэрэ тоодо 21 алтан медальтай нютагаа бусаһан байна. Уласхоорондын хэмжээндэ амжалта туйлаһан тамиршад сооһоо эгээл ехээр хэн хүн зониие баярлуулаа гээшэб? Эдээн тухай хэдэн мүрнүүдые бэшэжэ, 2016 оной дүн гаргая.

Инна Степанова

2015 ондо дэлхэйн чемпионадта Ородой суглуулагдамал команда түрүү һуури эзэлжэ, Олимпиин наадануудта хабаадаха эрхэдэ хүртөө бэлэй. Жэлэй хугасаа соо Бразили ошохо тамиршадай дунда шанга тэмсээн болоо. Һур харбалгын федерациин хүтэлбэрилэгшэдэй холын хараатай байһанай ашаар дэлхэйн чемпионадта шалгарһан басагад Олимпиадада ошоо. Тиигэжэ тэдэ аргагүй ехэ амжалта туйлаад, мүнгэн медальда хүртөө.

Үнгэрһэн долоон хоногто Олимпиин наадануудта амжалта туйлаһанайнгаа түлөө Инна Степанова хоёр таһалгатай байра абаха мүнгөөр Буряад Уласай засагай газарһаа урмашуулагдаба.

Александр Богомоев

2016 оной эхиндэ дэлхэйн бага чемпионат гэжэ суутай Иван Ярыгинай мүнхэ дурасхаалда зорюулагдаһан уласхоорондын мүрысөөндэ 57 килограмм хүрэтэр шэгнүүртэ Александр Богомоев түрүүлжэ гараа. Удаань Якутск хотодо эмхидхэгдэһэн угаа ехэ хэрэлдээ шууяатай Ородой чемпионадта баһа нэгэдэхи һуури эзэлээ. Хэды тиигэбэшье, Ородой суглуулагдамал командын һоригшод Олимпиадада Саха-Яхадай Виктор Лебедевые абаашаһан байна.

Ирина Ологонова

Олимпиин наадануудта хабаадахын түлөө шэлэлгын хоёр мүрысөөндэ Ирина Ологонова барилдахадаа, урагшагүйдэһэн байна. Энээнһээ боложо, хэдэн мүрысөөнүүдтэ, илангаяа Ородой чемпионадта Ирина ондоо шэгнүүрнүүдтэ барилдаа һэн. Теэд жэлэй эсэстэ И. Ологоновада амжалта наашалба: дэлхэйн чемпионадта гурбадахияа мүнгэн медальда хүртөө.

Сергей Хутаков

Буряадаймнай һур харбагша Бразилида болохо Паралимпиин наадануудта ошожо шадаагүй. Ородой эрэмдэг бэетэйшүүлэй командыеэдэ наадануудта хабаадуулаагүй бшуу. Москва шадар болоһон бүхэроссиин мүрысөөндэ Сергей Хутаков түрүүлжэ гараа. Һонирхолтойнь гэхэдэ, Паралимпиадада шүүһэн тамиршан Сергейһээ бага очко абаһан байна.

Владимир Максимов

Арбан жэлэй хугасаа соо ушуист Владимир Максимов Буряад ороноо суурхуулжа ябана. Мүнөө жэлдэ ушугаар анха түрүүшынхиеэ дэлхэйн Кубогта хүртэхын түлөө мүрысөөн үнгэргэгдэбэ. Буряадай тамиршан эндэ хүрэл медальда хүртэжэ, дахинаа түүхын хуудаһанда нэрэеэ бэшүүлбэ гээшэ.

Татьяна Андриевская

Оройдоол хоёр жэл соо бэеэ һур харбалгаар һорижо байһан эрэмдэг бэетэй, коляскаар ябадаг Татьяна Андриевская уласхоорондын хэмжээндэ шалгаржа шадаа. Тэрэ Европын чемпионой нэрэ зэргэдэ 2016 ондо хүртөө. Үшөө тиихэдэ “Байгалай годлинууд” болон Ородой Кубогта хүртэхын түлөө мүрысөөнүүдтэ элүүр бэетэй тамиршадай дунда түрүүлжэ шадаһан байна.

Баир Ринчинов

Даам наадалгаар түрүүшын уласхоорондын гроссмейстер Буряадтамнай 2016 ондо бии болоо. Энэ үндэр нэрэ зэргэдэ Баир Ринчинов хүртэһэн байна. Энэ хүнэй амжалта туйлаһанай ашаар Улаан-Үдэдэ баһа анха түрүүшынхиеэ бүхэроссиин хэмжээнэй мүрысөөн үнгэргэгдэбэ. Тус хэмжээ ябуулга даам наадалгаар мэдээжэ һоригшо ябаһан Феликс Александрович Завелинский гэгшын мүнхэ дурасхаалда зорюулагдаа.

Бадма Бадмаев

Басагадые боксын һоригшо 2016 ондо аргагүй ехэ амжалтануудые туйлажа шадаа. Тэрэнэй бэлдэһэн аяар табан тамиршад Европын чемпионадта хабаадажа, гурбаниинь илалта туйлаа.Эдэ хэд бэ гэбэл, Кристина Ткачёва, Ангелина Кабакова, Татьяна Константинова, Людмила Воронцова болон Любовь Шарапова гэгшэд болоно. “Олимпиин найдалнууд” гэһэн бүхэроссиин мүрысөөнэй үедэ Бадма Бадмаевта “Ородой эрхим һоригшо” гэһэн үнэмшэлгэ барюулагдаа.