999
Шэнэ жэлдэ дээдэ хэмжээнэй уласхоорондын олон мүрысөөнүүд болохоор хараалагдана. Буряадтамнай эмхидхэгдэхэ томо хэмжээ ябуулганууд тухай мүнөө үедэ хэлсэгдэжэ байна. Тэдэнэй үнгэрхэ саг болзор январь һарын хугасаа соо элирхэ юм. Тиимэһээ дэлхэй дээрэ эмхидхэгдэхэ ехэ мүрысөөнүүд тухай хүндэтэ уншагшадаа танилсуулхамнай.
Барилдаан
Заншалта ёһоороо барилдаашад ээлжээтэ хаha Красноярск хотодо эхилхэ. Январиин 27-29-нэй үдэрнүүдтэ эндэ “Голден Гран - при “Иван Ярыгин” гэһэн уласхоорондын мүрысөөн эмхидхэгдэхэ. Эндэ шалгарһан тамиршад өөһэдынгөө гүрэнүүдэй суглуулагдамал командануудай бүридэлдэ оруулагдажа, Европын, Азиин болон дэлхэйн чемпионадуудта хабаадаха эрхэдэ хүртэхэ. Мүн Ород гүрэнэй барилдаашад сооһоо түрүүлһэн тамиршад Европын чемпионадта хабаадаха. Хэды тиигэбэшье, һүүлэй хэдэн жэл соо үзэгдэһэн ушарнуудые хараад үзэбэл, ямаршье бэрхэ дүн харуулһан барилдаашан “би заал һаа Европын чемпионадта ошохоб” гэжэ хэлэжэ шадахагүй.
2017 онһоо хойшо барилдаанай нэгэдэмэл эмхиин жэлэй түсэб нэгэ бага ондоо болобо. Тиигэжэ Европын чемпионат март һарада бэшэ, май соо болгогдобо. Сербиин Нови Сад хото майн 2-7-ной үдэрнүүдтэ Европын эрхим барилдаашадые хүлеэн абаха. Мүн дэлхэйн чемпионат августын 21-26-да Парижда үнгэргэгдэхөөр түсэблэгдэнэ.
Заншалта болоһон уласхоорондын мүрысөөнүүд һара бүри эмхидхэгдэхэ юм. Тэрэ тоодо Буряад Уласай Толгойлогшын шанда хүртэхын түлөө тэмсээнүүд Улаан-Үдэдэ мартын 12-13-най үдэрнүүдтэ болохо юм.
Һур харбалга
Инна Степановагай ашаар Буряадай һур харбагшадта 2016 он аргагүй һайнаар үнгэрөө гээд тэмдэглэхээр. 2017 ондо бусад тамиршадһаа амжалта хүлеэн байнабди.
Ородой Холбооной үбэлэй хаhын чемпионат болон Кубогта хүртэхын түлөө мүрысөөнүүд февралиин эхиндэ үнгэргэгдэхэ. Эндэ шалгарһан түрүү тамиршад мартын 6-13-най үдэрнүүдтэ Франциин Виттель хотодо эмхидхэгдэхэ Европын чемпионадта хабаадаха эрхэдэ хүртэхэ юм.
Зунай үедэ эгээл томо мүрысөөнүүд гэхэдэ, Европын болон дэлхэйн чемпионадууд болоно бшуу. Европын мэргэшүүл Словениин Филд Мокрицо хотодо августын 3-9-нэй үдэрнүүдтэ сугларха. Октябриин 14-23-най үдэрнүүдтэ Мехико хотодо дэлхэйн чемпионат үнгэрхэ.
Сурдлимпиин нааданууд
Шэхэ хатуушуулай дунда нааданууд Олимпиин наадануудтай адли удха шанартай болонхой. Ээлжээтэ 23-дахи Сурдлимпиин нааданууд Турциин Самсун хотодо июлиин 18-30-най үдэрнүүдтэ үнгэрхэ. Бүхы дэлхэйн тамиршадай дунда спортын 21 зүйлөөр түрүүшүүл элирхэ юм.
Тус хэмжээ ябуулгада манай Буряадай тамиршад оролсожошье магад. Юуб гэхэдэ, 2016 ондо Александр Трескин, Николай Капустин гэгшэд дэлхэйн чемпионадта түрүү һуури эзэлһэн байна. Мүн Александр Цоктоев тэндэ гурбадахи һуурида гараа һэн. Эдэ гурбан Ородой суглуулагдамал командын бүридэлдэ оруулагдаад, һорилго гаража байна. Хэды тиигэбэшье, шэлэлгын шата гол Ородой чемпионадта болохо юм. Самсун ошохын түлөө манай тамиршад Саха-Яхадай болон Хойто Осетиин-Аланиин барилдаашадтай шанга тулалдаануудта тэмсэхэ. Хэрэлдээ, шууяагүй тэмсээнүүд болохо бэзэ гээд найдагдана.
Үшөө тиихэдэ Буряадаймнай мэргэшүүл Турци ошохо арга боломжотой байна. Пистоледээр буудадаг Цыпелма Намдакова болон Александр Гаськов гэгшэд һүүлэй үедэ яһала һайн үрэ дүн харуулна гээшэ.
Санаар урилдаан
Ородой суглуулагдамал командын бүридэлдэ оруулагдаад, дэлхэйн Кубогта хүртэхын түлөө мүрысөөнүүдтэ хабаадажа байһан Алиса Жамбалова дэлхэйн чемпионадта ошохо гү, али үгы гү гэжэ үшөө мэдэгдэнэгүй.
Шэнэ жэлэй һайндэрнүүдэй үедэ үнгэргэгдэһэн суута “Тур де Ски” гэһэн мүрысөөндэ Алиса анха түрүүшынхиеэ бүхы урилдаануудта хабаадажа, 30-дахи һуури эзэлһэн байна. Жэл бүри тэрэнэй дүнгүүд дээшэлжэ байна гэжэ хэлэхэ шухала.
Допинг хэрэглээ гэжэ хардагдаһан Ородой санашад дэлхэйн чемпионадта ошохо аргагүй байгаа гэжэ мэдээжэ, гэбэшье томошуулай дунда энэ тэмсээндэ Алиса орожошье магад.
Санаар урилдаагаар дэлхэйн чемпионат февралиин 21-һээ мартын 5 болотор Финляндиин Лахти хотодо үнгэрхэ юм. Тус мүрысөөн 2018 оной Пьёнчанг хотодо эмхидхэгдэхэ Олимпиин наадануудай урда тээхи эгээл һүүлшын томо хэмжээ ябуулга болоно гээшэ.
Бүмбэгэтэй хоккей
Февралиин 22-26-най үдэрнүүдтэ Эрхүү хотодо 17 наһа хүрөөдүй басагадай дунда дэлхэйн чемпионат үнгэргэгдэхэнь. Иимэ томо хэмжээ ябуулга манай хүршэ хотодо гурбадахияа болохонь. Үшөө 2012 ондо бүмбэгэтэй хоккейгээр эхэнэрнүүдэй дунда тэмсээнүүд болоо һэн. 2014 ондо эрэшүүлэй дунда дэлхэйн эгээл бэрхэ команданууд Ангара мүрэнэй эрьедэхи хотодо мүрысөө.
2017-2018 онуудта Эрхүү хотодо бүмбэгэтэй хоккей наадаха томо талмайтай, хушалтатай ордон баригдахаар хараалагдана. Юуб гэхэдэ, 2019 ондо эндэ баһа эрэшүүлэй командануудай мүрысөөн түсэблэгдэнэ.
Автор: Борис БАЛДАНОВ
