​​Кристина Ткачёвагай ээлжээтэ амжалта

Буряадаймнай боксёр Кристина Ткачёва 19-22 наһанай тамиршадай дун­да Европын чемпионадта түрүү һуури эзэлбэ. Иимэ ехэ амжалта Хойто Осети - Алани Уласта туй­лагдаа гээд хэлэлтэй.

Кристина Ткачёва “Номто” гэһэн спортын клубай дэргэдэ Бадма Бадмаев һоригшын уда­ридалга доро бэлэдхэл хэдэг юм. 2018 ондо тэрэ ехэ амжалтануу­дые туйлаа бэлэй. Ехэшүүлэй дун­да Улаан-Үдэдэ үнгэргэгдэһэн Оро­дой чемпионадта нэгэдэхи һуури эзэлээ. Намартаа тэрэ дэлхэйн чемпионадта гурбадахи һуурида гараа бэлэй.

19-22 наһатай тамирша­дай дунда мүрысөөнүүдтэ Кри­стина Ткачёва бэрхэ байһанаа гэршэлһээр. Владикавказай ринг дээрэ Буряадай боксёр хоёр да­хин гараа. Түрүүн тэрэ Турци гүрэнэй Суеда Сахин гэгшые ила­жа гараа. Харин финалда гараһан Румыниин боксёр Габриэла Эне түрүүшын раундын удаа уулзалгаа үргэлжэлүүлхэеэ арсаа. Тиигэжэ Кристина Ткачёва үшөө ехэ нэгэ амжалтада хүртэбэ.

Тус мүрысөөндэ Ородой су­глуулагдамал командын түлөөлэгшэд 15 медаль абажа шадаа. 12 алтан медальнуудайнь 5-иинь эхэнэрнүүд абаһан байна. Бүхы дэ­эрээ 38 гүрэнэй 270 гаран тамир­шан ринг дээрэ гараа.

Бадма БАДМАЕВАЙ дурадхаһан гэрэл зураг