909
Ородой Холбоото Уласай Юрэнхылэгшэ Владимир Путин Байгал далай ариг сэбэрээр сахижа, ерээдүйн үри һадаһадта дамжуулха гээшэ гүрэнэй зорилго болоно гэжэ хэлэбэ.
- Бидэ Байгал болон Байгалай газар дайдын хүгжэлтэ тухай мүнөө хэлсэхэбди. Байгал далай гансашье Ород гүрэнэй бэшэ, харин бүхы дэлхэйн баялиг юм. Тиимэһээ тэрэниие ариг сэбэрээр сахижа, ерээдүйн үри һадаһадта дамжуулха гээшэ гүрэнэй зорилго болоно. Ямаршье харюусалгагүйгөөр нуурай эрьедэ ажахы ябуулһанай хойшолонгуудта онсо анхарал хандуулагдаха. Байгалай экосистемэдэ үзүүлэгдэһэн хохидол усадхаха, - гэжэ Владимир Путин хэлэбэ.
Ородой Холбоото Уласай Юрэнхылэгшын тэмдэглэһээр, Байгалай эрьеын ехэ газар дайда бузарлагдаһан байна. Байгалай ЦБК болон Зэдын комбинат хаагдаһаншье һаа, тэдэнэй үйлэдбэриин үлэгдэлнүүд уһа бузарлаһаар. Тиимэһээ эндэхи газар дайдын, уһанай шанар дээшэлүүлхэ талаар ажал ябуулха шухала. Энэ хэрэг бэелүүлхэ хүнүүдые томилжо, хаанаһаа мүнгэн һомологдохоб гэжэ шиидхэхэ хэрэгтэй. Байгалда ородог сэбэрлэгдэгүй уһанай тоо бага болгохо. Энэ асуудалаар уласай хүтэлбэрилэгшэдые федеральна засаг зургаан дэмжэхэ.
“Байгалай газар дайдада эдэй засагай хүгжэлтэ болон байгаали гамнаха талаар ажал тэнсүүритэйгээр ябуулха шухала. Эндэхи ажаһуугшадай байдалда һаад ушаруулагдаха ёһогүй. Тиигэбэшье хүнүүдэй тала барижа, Байгалай экологи муудхааха баһал хэрэггүй. Жэшээнь, олзын хэрэг эрхилэгшэд мүнгэ ехээр олохо гэжэ, байгаали хамгаалгын нормонуудые эбдэнэ. Тиимэһээ байгаали хамгаалгада зорюулһан түсэлнүүдые бэлдэхэ хэрэгтэй”, - гэжэ Владимир Путин тэмдэглэбэ.
Ородой Холбоото Уласай Юрэнхылэгшэ хуули бусаар, байгаалида хохидолтойгоор ажал ябуулдаг ажахынуудые шалгажа, хэрэгтэй хэмжээнүүдые абаха тухай генеральна прокуратурада хандаба.
