893
Ородой Холбоото Уласай Транспортын сайдай орлогшо, далайн болон голой транспортын федеральна агентствын хүтэлбэрилэгшэ Виктор Олерский Буряад Улас ерэхэ.
Сентябриин 13-да Улаан –Үдэдэ Байгал далайда уһанай транспорт болон аяншалга хүгжөөхэ талаар эмхинүүдэй хоорондын ажалай бүлэгүүдэй зүблөө Ородой Холбоото Уласай Транспортын сайдай орлогшо үнгэргэхэ.
Зүблөөндэ энэ талаар ажалай бүлэгэй үнгэргэхэ хэмжээ ябуулгануудай түсэб баталагдахаар хүлеэгдэнэ. Эндэ абтаһан шиидхэбэринүүд Байгал далайда тохёолдоһон экологиин байдал һайжаруулха, хангалгын байгууламжын асуудалнуудые шиидхэхэ, уһанай транспортын һалбарида байдал хубилгаха талаар удха шанартай юм гэжэ Буряад Уласай Толгойлогшын болон Засагай газарай мэдээсэлэй албанда тэмдэглэнэ. Тиихэдэ суг хэмжээ ябуулгануудые бэелүүлгэ уласай аяншалгын һалбари хүгжөөлгэдэ удха шанартай.
Байгша оной июниин 8-да ажалай бүлэгэй үнгэргэһэн зүблөөндэ Байгал далайда онгосонуудай аюулгүй байдал, онгосонуудые бариха талаар мүнгэ һомололго, хангалгын байгууламжа һайжаруулха талаар хэлсэһэн байна. Тиихэдэ Байгал далайгаар ааяншалагшадые шэрэлгэ, аяншалга хүгжөөхэ асуудалнуудаар эмхинүүдэй суг хэмжээ ябуулга үнгэргэхэ талаар шиидхэбэри абтаһан байха юм. Удаань энэ асуудалаар июлиин 28-да үнгэргэгдэһэн зүблөөндэ Буряад Уласай болон Эрхүү можын Засагай газарнуудай болон олзын хэрэг эрхилэгшэдэй дурадхаһан түсэбүүдые тодоор хаража үзэһэн юм.
