​Буряад Уласта 43 хүн сайдай тушаал эзэлхэ хүсэлтэй

Буряад Уласай Толгойлогшын болон Засагай газарай захиргаанай гүрэнэй албанай болон ажаллагшадые бүридхэхэ бодолгын хороондо сайдай тушаал эзэлхэ конкурсдо 43 хүн мэдүүлгэ оруулаа.

Байгша оной октябриин 23-да мэдүүлгэ оруулха болзор түгэсэхэ. Тиихэдэ Аяншалгын сайдай тушаалда эгээл олон, 15 мэдүүлгэ оруулагданхай. Октябриин 20-най мэдээгээр, Эдэй засагай сайдай тушаалда 13 мэдүүлгэ, Элүүрые хамгаалгын сайдай тушаалда – 10, Соёлой сайдай тушаалда – 3, Спортын болон залуушуулай бодолгын талаар сайдай тушаалда 2 мэдүүлгэ оронхой. Конкурсдо хабаадагшад 30-һаа 55 наһанай хүнүүд.

Буряад Уласай Элүүрые хамгаалгын, Соёлой, Аяншалгын, Спортын болон залуушуулай бодолгын талаар болон Эдэй засагай сайдуудай тушаалда конкурс соносхогдонхой гэжэ һануулнабди.

Буряад Уласай Толгойлогшо Алексей Цыденовэй хэлэһээр, энэ конкурс нээмэл аргаар үнгэргэгдэхэ. Мүнөө мүрысөөнэй табан комисси байгуулагдана, тэдэнэр яаман бүхэндэ тушаалда зууршалагшадые шэлэн абаха. Буряад Уласай Арадай Хуралай, яамануудай дэргэдэхи олониитын зүблэлнүүд, Олониитын танхимай гэшүүд комиссиин бүридэлдэ орохо. Буряад Уласай Толгойлогшо Алексей Цыденов хабаадагша бүхэнэй дансануудтай болон тэдэнэй дурадхаһан программатай танилсаха.