​Баяр Очиров: «Басагаяа һургахаа барилдаанда бусааб»

Наһатайшуулай дунда сүлөөтэй барилдаагаар эмхидхэгдэһэн дэлхэйн чемпионадта гурбадахи һуури эзэлһэн 52 наһатай Баяр Очиров өөр тухайгаа, яагаад тулалдаабиб гэжэ манай сур­балжалагшада хөөрэжэ үгэбэ:

- Манай Буряадһаа дэл­хэйн чемпионадта гурбан хүн хабаадаһан байна. Евгений Дайдапов түрүүшын уулзал­гада шэлэ хүзүүгээ гэмтээжэ, тулалдаанһаа гараа. Матвей Илюхинов табадахи һуури эзэ­лээ. Тэрэ гурбадахи һуури эзэл­хэ аргатай аад, бэеэ гэмтээгээ. Тиимэһээ гансаараа медаль абаһандаа баяртайб.

- Тэндэ яагаад гурбадахи һуури эзэлжэ шадаабта?

- Энэ мүрысөөн Болгариин Пловдив хотодо эмхидхэг­дээ. Тэндэ ошохын түлөө ехэ саг харгыда һалгааһан байнабди. Мүнгөөр дуталдахадаа, түрүүн поездоор Красноярск ошооб­ди. Удаань самолёдоор Москва ниидээд, тэндэһээ Амстердам агаарай онгосоор хүрөөбди. Тэндэһээ баһа самолёдто һуужа, София хүрөөбди. Автобусоор 150 километр ябажа, одоошье Плов­див хүрэһэн байнабди.

Эндэ гурба дахин хибэс дээрэ гарааб. Хахад финалай тулалдаанда нюдэн дээрэхи нидхэһээмни шанга шуһан га­раа. Энэ шалтагаанһаа боложо, шүүжэ шадаагүйб. Хүрэл медаль абахын түлөө барилдахадамни, нидхэһээм дахинаа шуһан га­раа. Мүрысөө хангажа байһан эмшэд шуһыем тогтоожо шадаа. Тэдэ минии бурхад боложо, шан­гай гурбадахи һуури эзэлхэдэм туһалалсаһан байна.

- Багаһаа хойшо барил­дана гүт?

- Үгы ааб даа. Юуб гэхэ­дэ, һургуули би Шэтэ хотодо дүүргэһэн байнаб. Тэндэ сүлөөтэ барилдаан тиимэ ехээр хүгжэнги бэшэ. Тэрэ үедэ штанга үргэдэг байгааб. 10-дахи классай ябаад, ехэшүүлэй дунда Шэтэ можын чемпион болооб.

Буряадай багшанарай дээдэ һургуулида ороод, нэгэ бага зэр­гэ барилдажа эхилһэн байнаб. Тиимэшье дүн харуулаагүйб.

Үбэр Байгалай хизаарай За­байкальск хотодо ажаһуухадаа, басагаяа барилдаанай секцидэ абаашаад, өөрөө дахинаа барил­дажа эхилээб. 30 гаран жэлдэ хибэс дээрэ гараагүйб. Хэдэн саг соо хоюулаа һорилго хэдэг байгаабди. Һургуулида хоёрдохи халаанда һуража эхилээд, барил­даагаа орхёо. Би мүнөөшье боло­тор барилдажа ябанаб.

- Саашадаа ямар түсэб- тэйбта гэжэ хөөрэжэ үгыт?

- 50 наһа гарашоод ба­рилдажа ябахада хүндэ бай­на. Мүн суг хамта һорилго хэхэ зоной үсөөн байхада, һонигүй болошоно. Тиимэһээ Буряад­таа наһатайшуулай дунда ба­рилдаа һэргээхэ гэжэ хүбүүдээр түсэблэжэ байнабди. Удаань одо­ошье олон медальнуудые гэртээ асардаг болохобди.

Хараад үзэхэдэ, Кавказай ре­гиондо, Америкэдэ, Турцида, Иранда наһатайшуулай дун­да барилдаан ехэ хүгжэнхэй. Мүрысөөнүүдтэ 100 гаран хүнүүдые эльгээнэ. Бидэ юугээрээ дутаха болообибди.

- Һайн даа, үшөө ехэ ам­жалта таанадта хүсэнэб!