989
Эгээл эдир илагшад
Үнгэрһэн долоон хоногой эсэстэ буряад бүхэ барилдаагаар энэ жэлэй түрүүшын мүрысөөн эмхидхэгдэбэ. Заншалта ёһоороо тус хэмжээ ябуулга Гоман дасанай Хамба ламанар байһан Галсан Лэгдэн Аржигаров болон Агван Нима Цыдыпдоржиев гэгшэдтэ зорюулагдаа.
Мүрысөө нээлгын баяр ёһололой үедэ Бандида Хамба лама Дамба Аюшеев, Буряад Уласай Арадай Хуралай хорооной түрүүлэгшэ Цыденжап Батуев гэгшэд бүхы сугларагшадые һайхан үгөөрөө амаршалаа.
Галсан Лэгдэн Аржигаров Түнхэнһөө уг гарбалтай байһан юм. Тиимэһээ жэл бүхэндэ энэ хэмжээ ябуулгада Түнхэнэй түлөөлэгшэд хабаадалсадаг. Энэшье удаа Улаан-Үдэдэ ажаһуудаг Түнхэн нютагаархидай “Саяны” эблэлэй хүтэлбэрилэгшэ Баяр Турбянов ерэжэ, үнэн зүрхэнһөө баярай үгэнүүдые хэлээ. Хэрэнэй дунда һургуулиин шаби Доржо Шохонов 2017 ондо бүхэ барилдаанай мүрысөөнүүдтэ амжалтатайгаар хабаадаһанайнгаа түлөө гарай бэлэгтэ хүртөө.
10-дахияа боложо байһан мүрысөөндэ 772 эдир барилдаашад хабаадаа. Тэдэ 9 шэгнүүртэ эгээл эрхимүүдые элирүүлһэн байна. Нима Дондупов, Баяр Баяндуев (Баргажан дасан), Сергей Банзаракцаев (Сээжэ Бургалтайн дасан), Арсалан Халзанов (Загаһатын дасан), Саша Долсонов (Санагын дасан), Александр Ямпилов (“Балдан Брэйбун” дасан), Миша Дадуев (Алайрай дасан), Зорикто Кишиктуев (Ивалгын дасан) болон Данзан Цыдыпов (Чесанын дасан) гэгшэд өөр өөрын шэгнүүртэ илагшад болоо.
Томошуулай дунда хибэс дээрэ 200 гаран хүн гараа. Һүүлэй дүрбэн жэл соо Сэлэнгэ аймагай Ноёхон һууринһаа уг гарбалтай Гончик Бадмаев гурба дахин илалта туйлаһан намтартай. Энэшье удаа тэрэ 63 килограмм хүрэтэр шэгнүүртэ чемпион боложо тодороо. Гончик Захаамин аймагай Сээжэ Бургалтайн дасанай түлөөлэгшэ Солбон Раднаевай нюргыень шоройдуулаа.
75 килограмм хүрэтэр шэгнүүртэ Хурамхаан аймагта нэгэ ангида суг һураһан Артём Раднаев болон Арсалан Биликтуев хоёр уулзажа, Артём нүхэрөө унагааба.
75 килограммһаа үлүү шэгнүүртэ түрэһэн үдэрөө тэмдэглэжэ байһан тамиршад финалда гараа. Сээжэ Бургалтайн дасанай түлөөлэгшэ Ринчин Санжиев энэ үдэр Хэжэнгын дасанай Аюр Алдаровые илажа шадаба.
Ринчин Санжиев
Борис Балданов
Борис Балдановай гэрэл зурагууд
