782
Ородой Холбоото Уласай Засагай газарай Түрүүлэгшын орлогшо – Алас Дурнын федеральна тойрогто Юрэнхылэгшын бүрин эрхэтэ түлөөлэгшэ Юрий Трутнев Буряад Уласай Толгойлогшо Алексей Цыденовтэй хамта ойн түймэртэ абтаһан газарнуудые болон энэ талаар тохёолдоһон байдал шалгаба.
- Ойн түймэрэй талаар Буряад уласта байдал орёошье һаа, хинагдана. Ойн 10 түймэрэй 9-ниинь түрүүшын үдэр сарагдана. Хүнүүд эсэнэ,тэдэнэр үдэр һүнигүй ажалаа ябуулһаар. Ойн түймэрнүүдэй һүжэрхэ талаар Буряад уласта бусад можо нютагуудта орходоо, орёо байдаг. Тиигэбэшье мүнөө Эрхүү можо, Үбэр Байгалай хизаар, Красноярска хизаартахи байдал бүри орёо, - гэжэ Алексей Цыденов тэмдэглэбэ.
Зунай сагта сахилгаанһаа ехэнхи түймэрнүүд хада уулаар тарана. Тэндэ гараһан түймэрнүүдые саралгада вертолёдууд ашаглагдана гэжэ уласай хүтэлбэрилэгшэ онсолбо.
- Мүнөө Хойто-Байгалай аймагта ойн түймэрэй аюулай онсо байдал соносхогдонхой. Июлиин 3, 11-нэй үдэрнүүдтэ буудал буужа, 11 газарта түймэр һүжэрһэн байна. Тэдэнэй дүрбыень авиахиналта хэгдэнэ, унтараагдана. Бэшэниинь замбуулинһаа хинагдана. Хойто-Байгалай аймагта гараһан түймэр саралгада уласай бусад аймагууд туһална, - гэжэ Алексей Цыденов хэлэбэ.
Түймэрэй аюултай хаһын эхилһэн сагһаа хойшо Буряад уласта 132 мянган гектар хүрэтэр ойн 454 түймэр гараһан байна гэжэ бүридхэлдэ абтанхай. Тэрэнэй хахадһаа ехэнхинь хайша хэрэгээр галда хандаһан, ойдо түймэрэй аюулгүй байдал сахиха дүрим эбдэһэн ушарһаа гараа. Тиихэдэ, түймэрэй гараһан дүрбэнэй нэгэ ушар гэхэдэ – сахилгаан.
Алас Дурнын федеральна тойрогто Юрэнхылэгшын бүрин эрхэтэ түлөөлэгшэ Юрий Трутнев ойн жаса шалгаһанай удаа, ойн түймэрнүүдые һэргылхэ, унтарааха талаар ажал эршэдүүлхэ тухай Буряад Уласай Засагай газарта даалгаба.
