​Гуурһаяа туршанабди

«Сэдьхэлэй галхан» гэһэн Хэжэнгын дунда интернат-hургуулиин литературна кружогой һурагшадай туршалга­нууд.

Хүтэлбэрилэгшэ: Абидуева Лариса Николаевна.

     

Аюшеева Дулма, 11-дэхи классай hурагша

БУРЯАД ОРОМНИ

Үндэр хадануудаар

                               хүреэлэгдэһэн,

Үргэн мүрэнүүдээр

                                угалзатаһан,

Талые бүрхөөһэн малнуудтай

Тэнюун баян Буряад оромни.

Буряад ороноо шэртэн

                                       харанам:

Байгал далай, Бархан уула,

Саһан дуулгата Саяан уула -

Сэлгеэн уужам Сэлэнгын тала,

Хонгор hайхан Хориин аймаг,

Хуудам талата

                        Хэжэнгэ нютагни.

ТҮРЭЛ НЮТАГНИ

Мүнгэн хашарhаа туужа,

Мэлмэрэн урдана Хэжэнгэм.

Хуудам сагаан талада

Хүгжэмөө татана жэргэмэл.

Сэнгүү талым сээжэдэ

Сэсэгүүд hалбарна угалзатан.

Хүбшэ тайга, хадаарнай

Хүдэр амитад харайна.

Байгаалиин шэдитэ булаг

Бурьялан, харьялан урдана.

Арад зомнай жаргалтай

Амгалан тэнюун ажаhууна. 

 

Ананьева Виктория, 10-дахи классай hурагша

БУРЯАДНИ

Дэлхэй дээрэ олон ондоо

Дүүрэн газар байбашье,

Дура зүрхым татаһан

Дуулим Буряадни һайхан даа.

Үзэсхэлэн гоё байгаалитай,

Үргэн тала дайдатай,

Үбгэн буурал Байгалтай

Уужам Буряадни һайхан даа.

Тааража һууһан байдалтай,

Түбшэн даруу арадуудтай,

Түүхэ домогоороо баян

Түрэл Буряадни һайхан даа. 

Цырендоржиева Эмилия, 7-дохи классай hурагша

УШХАЙТАМНИ

Уужам тэнюун Ушхайтам

Шэмэтэй ногоон талатай,

Хурьгад һайхан аршаантай,

Ажалша арад зонтой –

Иимэл минии тоонто!

Түрэһэн гараһан нютагайм

Арюун һайхан Субарга

Манай сэдьхэл заһана,

Нангин тээшэ залана –

Иимэл минии тоонто! 

Цыренова Бальжан, 5-дахи классай hурагша

МИНИИ БААБАЙ

Ажалда дуратай баабайм

Адуу малаа харадаг.

Багаһаам намай хараһан

Баабайм намдаа һайхан.

Холо һуража байхадаа,

Ходол һанажа ябанаб.

Намайгаа эрхэлүүлдэг

                            баабайм

Намдаа ехэл хайратай.