![](/upload/iblock/ffb/ffb95f1b022ec196a5b9c97e155f56fa.jpg)
Апрель һарын аятай намжаахан үдэрнүүдтэ Түнхэнэй аймагта Россиин Уран зохёолой жэлдэ дашарамдуулагдаһан хэмжээ ябуулганууд үндэр хэмжээндэ үнгэрбэ. Тус хэмжээнүүд аймагай захиргаанай толгойлогшо А.Г. Самариновай, депутадуудай Соведэй түрүүлэгшэ А.В.Сыреновэй, социальна талаар толгойлогшын орлогшо В.С.Морхоевагай дэмжэлгээр эмхидхэгдэһэн байна. Мүн лэ энэ хэрэгтэ буряад хэлэнэй багшанарай, соелой зургаанай, аймагай номой сангай, “Саяны” сониной редакциин, һуралсалай таһагай хубитаяа оруулһаниинь дамжаггүй. Саяан үндэр уулын хормойдо түбхинэһэн түнхэнөөрхинэй баян дэлгэр сэдьхэлтэйнь, бэлиг талаангаар элбэгынь мэдээжэ ха юм даа.
Мүнхэ Сарьдагай нэрэмжэтэ литературна нэгэдэлэй түүхэтэ зам
Аяар холын 1936 ондо Хэрэнэй һургуулида уянгата поэт Дольен Мадасон “Түнхэнэй хабар” гэжэ уран зохёолдо дуратайшуулай, эхилэн бэшэгшэдэй бүлэг нээжэ, 5-6 классуудай хорёод шахуу үхибүүдые суглуулһан тухайнь элитэ поэт Лобсон Тапхаев бэшэһэн байдаг. Тэрэ кружогто педагогикын эрдэмэй кандидат, багша, фронтовик С.Г. Дугаров, бэлигтэй багшанар болоһон Д.Ш.Будаев, Ш.Д.Санжеев, Д.С. Манзарханов, поэдүүд Ц.Зарбуев, Д-Н. Машкинов, Д.Сордохонов (булта Эсэгын дайнһаа бусаагүй) эгээл эдэбхитэй гэшүүдынь байгаа.
Табяад онуудта Хэрэнэй һургуулида Н.А. Тулусоева буряад хэлэ заахадаа, тэрэ кружок үргэлжэлүүлһэн юм. Надежда Арсентьевна табяад гаран жэлэй туршада тус һургуулида хүдэлжэ, арадай багша гэһэн үндэр нэрэ зэргэдэ хүртэһэн юм. Кружогтонь Борис Сыренов, Лобсон Тапхаев, Илья Намсараев гэгшэд ябажа, “Түнхэнэй хабар” гэжэ гар бэшэгэй журнал үргэлжэлүүлһэн байна. Эдэ хүбүүднай һүүлдэнь бэлиг ехэтэ зохёолшод боложо, бүхы дэлхэйгээр суурхаха гэжэ хэн тиихэдэ мэдэхэ бэлэй?
Саг жэлэй ошоходо, “Түн- хэнэй хабар” Мүнхэ Сарьдагай нэрэмжэтэ литературна нэгэдэл болотороо һалбараад, СССР-эй, Россиин Уран зохёолшодой, Журналистнуудай холбооной 16 гэшүүдые һурган гаргаһан арюун һайхан замтай юм. Арадай поэт Лобсон Тапхаев тус нэгэдэлые 14 жэлэй туршада хүтэлбэрилхэдөө, Буряадай Уран зохеолшодой холбоон, “Байгал” журнал, номой хэблэл, республикын газетэнүүд, радио болон телевиденитэй нягта холбоотойгоор ажалаа ябуулдаг байһанаа “Саяанай самаряан” гэжэ ном соо тэмдэглэнэ: “Николай Дамдинов, Цэрэн Галанов, Дондог Улзытуев, Мэлс Самбуев болон бусад олон ахашье, үетэншье нүхэдэй саг соонь хэһэн дэмжэлгэ һанангүй яахабибди?! Түнхэнэй эхилэн бэшэгшэд республикын залуу уран зохёолшодой конференцинүүдтэ хабаадалсажа, зохёолнуудаа зүбшэн хэлсүүлээ, магтуулхань магтуулаа, дэмжүүлхэнь дэмжүүлээ, холо, ойрын семинар зүблөөнүүдтэ эльгээгдэжэ байгаа. Илангаяа И. Намсараев, Э. Манзаров, Ж. Юбухаев, Б. Романов гэжэ залуу үетэн энэ азада хүртэһэн байна”. Лобсон Тапхаевай бэшэһэн эдэ мүрнүүдэй саана ямар эршэтэй, сог зали ехэтэй ажал, хүтэлбэрилэгшын бэлиг харагдана гээшэб?!
Лобсон Тапхаевай удаа элитэ поэт Борис Сыренов, тэрэнэй һүүлдэ һая болотор Жорж Юбухаев тус нэгэдэлые хүтэлбэрилһэн байна. Ж.Юбухаеваймнай хүндэ үбшэндэ нэрбэгдэжэ, наһа бараһаниинь голхормоор лэ даа. Һүүлэй үедэ Мүнхэ Сарьдагай литературна нэгэдэлэй дали дороһоо ялас гэмэ бэлигтэй зохёолшод гараа һэн. Нэрлэбэл, Россиин Уран зохёолшодой холбооной гэшүүн, Буряадай, Россиин габьяата эмшэн А.Д. Прушенов, Николай Дамдиновай нэрэмжэтэ шангай лауреат Лопсон Гергенов, Россиин юрэнхы һуралсалай хүндэтэ хүдэлмэрилэгшэ, “Эрхим багша” гэһэн мүрысөөнэй “Дундаршагүй далай” гэжэ номинациин лауреат, Мухар-Шэбэрэй аймагай хүндэтэ эрхэтэн Е.Г.Цыбикжапова, залуу уран зохёолшодой 15-дахи конференцидэ хабаадагша Е.Д. Шенхорова, юрист мэргэжэлтэй Б.Д. Зурбаев, Аршаанай лицей-интернат алтан медаляар дүүргэһэн, психолог мэргэжэлтэй Наталья Сыбенова гэгшэд болоно.
Мартагдашагүй уулзалганууд
Уран зохёолой жэлые нээлгэнэй түсэб табигдажа байха үедэ аймагай депутадуудай Соведэй түрүүлэгшэ А.В. Сыренов тон гүнзэгы удхатай дурадхал оруулһан юм. Нэн түрүүн урдаа хараха аха захатан, нэрэтэй солотой уран зохёолшодоо уриха тухай хэлэхэдээ, ургажа ябаа “улаан бургааһаднай”, мүн лэ холо, ойро нютагуудаймнай хүн зон заатагүй элитэ уран зохёолшодоороо уулзажа, тэдэнэймнай зохёолнууд зэдэлхэ еһотой гэжэ тэмдэглэһэн байна. Тиимэһээ апрелиин 2-ой үдэр уран зохёолшодоор, багшын ажалай ветерануудаар уулзалганууд болобо.
Тоорын дунда һургуулида Шулуутын, Далахайн, Зуун Мориной, Тоорын шабинар, багшанар, түрэлхид «Уран шүлэгэй долгин дээрэ» гэһэн уулзалга бэлдэбэ. Энэ уулзалгада аймагай захиргаанай түлөөлэгшэд Ю.А.Хоренов, А.В.Сыренов, наһатайшуулай Соведэй түрүүлэгшэ Л-Д.Д.Сыренов, эрдэм һуралсалай таһагай дарга Ч.Л-Д. Сыренов, аймагай номой сангай дарга Э.Д.Ардуева, “Саяны” сониной редактор С.Шагдурова, литературна нэгэдэлэй гэ- шүүд, багшын ажалай ветеранууд хабаадаба.
А.В.Сыренов (поэт Борис Сыреновэй хүбүүн, аймагай депутадуудай Соведэй түрүүлэгшэ) тус уулзалга нээхэдээ, манай ажабайдалда уран зохёолой үүргын ехэ байһан тухай хэлэбэ. Имагтал Мүнхэ Сарьдагай (Будажаб Найдаковай) түрэһэн гараһан тоонто нютагһаань юрэ бэшэ эхилбэбди гэжэ тэмдэглэбэ. Түрэл хэлэн дээрээ уран зохёолоо уншажа, мэдэжэ ябахые уряалба. В.Ж. Тулаев Мүнхэ Сарьдагай литературна нэгэдэл тухай богонихоноор хөөрэжэ үгэбэ. Е.Г. Цыбикжапова уран гоёор өөрынгөө шүлэг уншаба. Хабаадагшад уран шүлэгэй долгиндо үлгыдүүлэн, сэдьхэл хүдэлмэ жэгтэй оршолондо хужарлан байгаа бэлэй. Далахайн 2-дохи ангиин Головащенко Никита гэжэ хүбүүн “Би буряадби” гэһэн шүлэг сортоотойхоноор уншан, нэрьемэ альга ташалганда хүртэбэ.
Далахайн эхин классуудай һурагшад Ц-Б. Бадмаевай зохёолоор “Ямар хэлэн баян бэ?” гэһэн зүжэг харуулжа, сугларагшадые ехэл энеэлгэбэ даа. Тоорын, Зуун Мориной үхибүүд Ж. Юбухаевай, Э. Манзаровай, Ц. Зарбуевай, Е. Шенхоровагай, А. Прушеновэй, Мүнхэ Сарьдагай, Лобсон Тапхаевай шүлэгүүдые уншаба, хатар харуулба, дуу дуулаба. Харагшадай дура буляаһан Амгалан Янданов Лобсон Тапхаевай “Түнхэн тухай минии үгэ” гэжэ шүлэг уншахадань, олоной нюдэнһөө нелбоһон эзэлүүдгүй дуһахаяа һанаал хаш. Республикын, регион хоорондын “Эдир Будамшуу”, “Гэсэр” мүрысөөнүүдэй илагша Амгалан хүбүүнэй хүн зоной сэдьхэлэй хүбшэргэйе дайража, гүйсэдхэжэ байһан юумэнэйнгээ удхые ялас гэмээр харагшадта дамжуулжа шададаг бэлиг талаангаарнь омогорхомоор.
Жэмһэгэй дунда һургуулида Охор-Шэбэрэй, Харбяангуудай зонтой уулзалга “Уран үгын дээжэһээ амсая, нүхэд!” гэжэ уряа доро үргэлжэлбэ. Эндэ айлшадые аргагүй баян, зохидоор эмхидхэгдэһэн үзэсхэлэн хүлеэжэ байба. Майсаан Алсыевай, Борис Сыреновэй, Илья Намсараевай, Баяр Дугаровай, Баатар Романовай, Лопсон Гергеновэй, Жаргал Жербаевай зохёохы замаар дэлгээгдэһэн хэрэгсэлнүүд тон һонирхолтой байба.
Ахамад классай шабинар Ж. Никифоров И. Сыденова хоёр абьяастайханаар үдэшэеэ хүтэлбэрилбэ. Аргагүй дулаахан оршон байдал соо сугларһан гурбан нютагай хүн зон үнэн зүрхэнһөө оролдожо, багшанартайгаа, шабинартайгаа хамта дуу, хатар, шүлэг, зүжэг табиба. Үндэр тэгшэ бэетэй ахамад классай хүбүүд тайзан дээрэ гараад, Борис Сыреновэй шүлэгүүдэй мүрөөр “Намда бии” гэһэн композици харуулхадань, уран зохёолшын гэрэл зурагууд урдашни амиды мэтээр миралзажа байхадань, нээрээшье, энэ хүн дундамнай байна алтай, ямар шанга мэдэрэл түрүүлһэн зохёол гээшэб гэжэ олон хүн һанаа ёһотой. Жэмһэгэй багшанарай вокальна бүлгэмэй Борис Сыреновэй композитор Юрий Ирдынеевтэй бэшэһэн “Түнхэнэй вальс” дуулахадань, омогорхол түрэжэ байгаа бэлэй.
Нютаг нугынгаа хүнэй бэлиг талаангаар омогорхожо, тэдэ зонһоо жэшээ абажа ябахые Охор-Шэбэрэй һургуулида һургадагынь эндэ эли тодоор харагдаатай байба. М. Алсыев, Б. Дугаров, Б. Романов, Л. Гергенов, Ж. Жербаев гэгшэднай багаханшье һаа, буян хэшэг ехэтэ энэ нютагһаа гараһан бшуу. Эгээл тиимэһээ М.Алсыевай үльгэр нэрлэгдэһэн һургуулиин 6-дахи ангиин һурагша Гергенов Жамса, сэсэрлигэй аляа жаахан Ошорова Аяна Б. Романовай “Жэмһэг” гэжэ шүлэг, Л. Гергеновэй “Охор- Шэбэр” гэжэ шүлэг Саганова Татьяна, Жаргал Жербаевай “Заяанай зам” гэжэ шүлэг Шаракшанова Венера гэгшэд уран гоёор уншажа, олоной һайшаалда хүртэбэ. Илья Намсараевай “Городой басаган” гэжэ зохёолһоо хэһэг Харбяангуудай һурагшад зүжэглэн харуулба. Энэ уулзалгада багшын ажалай ветеранууд Г.Г. Тонтоева, З.Д. Дармаева гэгшэд хабаадаба, мүн лэ “Жэмһэг” гэһэн нютагай байгууламжын дарга Д.В. Актинова хубитаяа оруулһан байна. Харбяангууд, Охор- Шэбэр, Жэмһэг нютагуудай эмхи зургаанууд эб нэгэн, үрэ дүнтэйгөөр ажалаа ябуулна гэжэ ямаршье хүнэй хараад ойлгохоор байгаа һэн. Уулзалгын үедэ уран зохёолшоднай баяраа мэдүүлэн, шүлэг найруулгануудаа уншажа, түрэл хэлэеэ гамнажа, мартангүй ябахыень залуу һүрэгтэ захяа һэн.
“...Зохёолнууд соотнай- арадаймнай баялиг, аршаанаймнай дуһалнууд!” гэһэн уран зохёолой үдэшэ Шэмхын интернат- һургуулида үнгэрбэ. Тус һургуулида айлшадые буряад хубсаһаа үмдэһэн хүбүүд, басагад газаагаа сагаан эдеэгээр, ёохор наадаар угтажа байба. Актова зал соо хүн зон олон. Хэрэнэй, Хужарай, Шэмхын һурагшад, багшанар, түрэлхид сугларанхай. Хужарай һургуулиин директор В.В. Сыбенов, буряад хэлэнэй багша, поэтесса, Россиин юрэнхы һуралсалай хүндэтэ хүдэлмэрилэгшэ, Е.Г. Цыбикжапова хоёр энэ үдэшые хүтэлбэрилбэ. Шагдар Байминовай “Суранзан мэргэн Тулаевай соло” гэжэ поэмэһээ хэһэг уран гоёор Е.Цыбикжапова уншаба. Хэрэнэй һургуулиин багшанар һурагшадтаяа А. Ангархаевай “Эртын намар”, Э. Манзаровай “Алтан Мундарга” гэжэ дуунуудые ирагуу гоёор гүйсэдхэбэ. Б. Ябжановай зохёолһоо хэһэг Хужарай Будаева Айлана, В. Тулаевай “Алтан хараасгай” гэжэ туужаһаа хэһэг Хужарай Дашиева Зина, В. Сыреновэй “Гуламтын ошон” гэжэ зохёолһоо хэһэг Дашиева Люда гэгшэд гүйсэдхэбэ. Эгээл һайшаалтайнь гэхэдэ, Хужарай һургуулиин 1-дэхи ангиин һурагша Будаева Баярма өөрынгөө зохёоһон шүлэг ханхинаса уншажа, харагшадай дура буляаба. Олон һургуулинууд сооһоо гансал эндэ өөрынгөө зохёоһон шүлэг һурагша уншаа гэжэ тэмдэглэе. Бэлигтэй һурагшамнай поэтесса Е.Г. Цыбикжаповагай аша басаган болоно. Өөрөө Е.Г. Цыбикжапова Б. Дугаровай «Талисман» гэжэ шүлэг ор-шуулһанаа, олоной анхаралда согтойхоноор уншажа үгэбэ.
Шэмхын интернадай шабинар баһал бэлиг талаангаар бэшэнһээ дутуугүй байһанаа гэршэлбэ. Поэт Б.Зурбаевай “Шартай” гэжэ шүлэг Зурбаева Бэлигма, Элбэг Манзаровай “Наһанаймни гол” гэжэ шүлэг Сайдакова Санжима, Лопсон Тапхаевай “Ёохор” гэһэн поэмээр композици бүлэг һурагшад эрхим бэрхээр гүйсэдхэбэ. Хэрэнэй һургуулиин һурагша Базарова Дулма Е.Цыбикжаповагай “Бууза” гэжэ шүлэг сортоотойхоноор уншажа, нэрьемэ альга ташалганда хүртэбэ.
(Үргэлжэлэлынь хожом гараха).
Дашима Дампилова,
багшын ажалай ветеран.