(Урданай сагай үбгэдэй хөөрөөнһөө)
Нэгэ нютагта баян айлай бууса хооһоржо, хүн байхаяа болибо ха. Хаягдаһан бууса удангүй “шүдхэртэй” гэжэ нэршэбэ. Тэрэ гэһээр хэдэн жэлэй үнгэрһэн хойно хура бороотой жэл боложо, энэ буусын шэбхэтэй газар дээрэ үбһэ ногоон урагша хойшоо унажа байгаад, аргагүй һайнаар ургаба. Энэ буусын үбһэ ногоондо зон хорхойтобошье, хуряажа абахаһаа байха, бүри холуур тойрожо ябадаг болоһон байба.
Тэрэ нютагта ажаһуудаг доро зүрхэтэй, шадалтай, шамбай бэетэй Бата хүбүүн:
- Би хаягдаһан буусада байраар байжа үбһэ сабшаад, хуряажа абахаб, – гэжэ тэрэ багайнгаа зондо мэдүүлээд, нэгэ һайн тарган хонёор боосолдобо ха. Боосооной ёһоор Бата хаягдаһан шүдхэртэй буусада гурба хонохо болобо.
Бата хүбүүн буусада ерэжэ, нэгэ модон гэр соонь байрлаад, бүхэли үдэртөө һайнаар ургаһан хяаг ногоо хабтайтар сабшажа унагааба ха. Үдэшэлэн сайгаа шанажа уугаад, эсэһэн бэеэ амаруулха гэжэ модон гэрэй буланда табяатай байһан орон дээрэ унтахаяа хэбтэбэ. Бата һүни һэреэд, һүүжээ урилжа, буруу хараад хэбтэшэбэ. Гэнтэ модон гэрэйнь үүдэн шууяатайгаар нээгдээд, нэгэ юумэн гэр соо һаршаганаһаар ороһон шэнжэтэй боложо, үүдэниинь хар-яр хаагдашаба. Батын нойр сэлмэжэ: “Нөөхи шүдхэрынь орожо ерэбэ ха юм даа. Болохо юумэниинь болоно бэзэ”, – гэжэ шэбшээд, юунэйшье болоо һаа, тэмсэхээр бэлэн боложо, бэеэ зэһэбэ. Модон гэр соо орожо ерэһэн “шүдхэрэй” гэр соогуур иишэ- тиишээ ябуултахань дуулдаад, Батын хэбтэжэ байһан ороной хажууда дүтэлжэ ерэһэн шэнжэтэй болобо. Бата амяа абахаяа болишоод, шагнажа хэбтэбэ. Тэрэ “шүдхэрынь” хии юумэн хэбэртэй, Батын хэбтэһэн орондонь гар хүрэһэн шэнги боложо, мухлайгаарнь һаршагануулаад, хүл дээгүүрнь дамжаһаар, сээжэ бэедэнь дүтэлжэ ерэбэ ха. Бата һард байса бажуужа абаха гээд, һарбагад гэхэдэнь, гартань юуншье баригдангүй, хии һабардаад, һула һалашаба. Тэрэнь газаашаа гарашаба янзатай, зуһалангай гэрэй үүдэн хар-яр хаагдаад, гэр соо дахяад хон-жэн, абяа шэмээгүй болобо. Тииһээр үүр сайжа, гэрэлтэй болоходонь, Бата үбһэеэ сабшахаяа гараба.
Хоёрдохи һүни дахяад лэ иимэ ушар тохёолдожо, юунэйшье ерэһые Бата ойлгонгүй үглөөгүүр болгоод, шүүдэрэй хатаһан хойно сабшаһан үбһэеэ гаража тармаба.
Гурбадахи һүниеэ яажа үнгэргэһэнөө Бата иигэжэ хөөрөө һэн: “Сайгаа шанажа уугаад, унтахаяа хэбтэбэб. Һүниин тэнһээ үнгэржэ байхада, модон гэрэймни үүдэн хар-яр нээгдээд, хии бэетэй “шүдхэр” орожо ерэбэ даа. Бэеэ зэһэжэ, тэмсэлдэ орохоор бэлэн болонхой хэбтэнэб. Тэрэ “шүдхэр” һаршаганаһаар, ороноймни мухалайда бии болоходол гээд, хүл, сээжэ, бэе дээгүүрни дамжаһаар дамжаад, ута хюмһатай сула үһэн гар хоолойдомни аһалдашаба. Амимни хаагдажа, үхэхэ туйлдаа хүрэжэ байтараа: “Боосоогоор хони алдажа, зоной наадан болохоһоо байха, хосорхомни ха юм!” - гээд, бүхы хүсэеэ зангидажа-зангидажа, ута хюмһатай сула үһэн гарые саб шүүрэжэ баряад, арай шамай гэжэ хоолойгоо сүлөөлбэб. Нэгэ бага амяа дараад, тэрэ “шүдхэрэйнгөө” гар шашхатарнь бажуугаад, мушхажа-мушхажа, модон гэрэйнгээ үүдэн тээшэ шэдэжэрхибэб. Тэрэмни үүдэн багта “пэс” гэжэ хүндөөр унахадал гээд: - Һэ! Һэ! Яагаа хүсэтэй золиг бэ! – гээд, модон гэрэй үүдэн “хар-яр” хаагдаад, оро һэегүй үгы болошоо. Үнэн дээрээ аймшагтайшье, эсэбэритэйшье байгаа. “Эсэһэн хүн - үргэһэндэ һайн” гээд, бүхөөр унташооб”, – гэжэ Бата хөөрөөгөө дүүргээ һэн гэдэг.
Хүн зондо хаягдаад, “шүдхэртэй” гэжэ суурхаһан буусада доро зүрхэтэй, шадал шэнээ һайтай Бата хэлсэһэн ёһоороо гурба хоножо, тарган хони боосоогоор шүүгээ һэн. Нютаг нугадаа суутай болоһон Бата тэрэ хаягдаһан буусада жэлһээ жэлдэ һайхан үбһэ абажа, хүндэ ямбатай ажаһууһан юм гэлсэдэг. “Теэд хэнтэй Бата носолдоһон байгааб?” – гэжэ хэншье тайлбарилжа шадаагүй. Тайлбарилаа болоходоо , “Шүдхэртэй бууса” гээд лэ, дүүрээ бэлэй.
Б. Оротов найруулжа бэшэбэ.