​САХЮУСАН

Зуундаа дүтэлөөд ябатараа,

Зүнтэглэhэн сараа тэмдэггүй,

Бурхандаа аялаа бэлэйш даа,

Баарhан нагаса эжымнай.

Дүрбэн удаан жэлдэ

Дайнhаа хүбүүгээ хүлеэгээ.

Илалтын дүтэлhэн хойно

Нагасамнай алдалан унашоо.

Дайнhаа ерэhэн бэшэгүүдыень,

Сэрэгшын малгай, бүhыень

Хэнэйшье нюдэндэ харуулангүй,

Хадагалан баряад hуугша hэн.

Бүдөөр орёолготой нюусыень

Бариха, үзэхэ гэхэдэмнай:

– Холо газарта ябахадатнай,

Харалсаха танаа, – гэгшэ бэлэй.

Гэрhээ холо гарахадашни,

Гэртээ үдэшэн hуухадаа,

Бурханайнгаа гунгарбаа сооhоо

Болошоhон боолтоёо гаргаха.

Маани, мэгзэмээ шэбэнээд:

– Ерэ даа, хүүхэмни! – гэхэ.

Гурба дахин боолтоороо

Толгой, турыешни адислаха.

Нагаса эжымнай мэндэдээ

Нэгэшье хайра хγлеэгээгγй.

Нэгэтэшье гомдожо, голхоржо,

Нима нагасыемнай шаналаагγй.

Хуушаржа хэлтышэhэн гэртээ

Гашуун тамхитай гааhаяа

Хододоо нэрэжэл hуухадаа,

Гашуудалда абтажашье болоо.

Нагасыемнай орден, медальнууд,

Нугалаатай гурбалжан бэшэгүүд,

Сэрэгшын малгай, бүhэ

Сахюусан болоhон түүхэтэй. 1991 он.

Дамбо Хобраков,

Буряадай Уран зохёолшодой холбооной гэшүүн.