![](/upload/iblock/10f/10f87c1b7979e270eb879a302158c470.jpg)
Энэ түби дэлхэй дээрэ ажаһууһан, һуужашье байгаа олон тоото хүн зоной дундаһаа Чингис богдын мандуулжа, һалбаруулжа байһан монгол арадай нэгэ һалаа болодог буряад арад ха юмбибди.
Амидаржа ажаһуухын, уг үндэһэеэ саашань үргэлжэлүүлхын түлөө нютаг нугадаа байгаалиин уларилтай тааруулжа, ажал хэхэ ёһотой байгаа.
Арюун сэнхир, амгалан тайбан Ага нютагаархид мал ажалтай байһан.
Арад зоной дунда “мал харахада – ама тоһодохо, һургуулида һурахада – ухаан бэлиг үгэхэ” гэлсэдэг ха юм.
Онон хатан эжытэй, Алхана агуула абатай агынхид хүн зоной хэр угһаа мал ажалтай байһан. Мүнөөшье мал ажалаа ябуулжал байдаг зандаа.
Минии гэртэхиншье мал ажалтай ябаа.
Совет гүрэнэй тогтоһоор хэдэн жэлэй үнгэрхэдэ, үмсөөрөө эндэ тэндэ ажаһууһан урагшаа һанаатай нютагаархид эбтэй эетэй хэлсэжэ, хамтарха түб байгуулхаяа бодобо. Колхоз байгаа үгы ха юм даа. Хэлсэжэ, хөөрэлдэжэ, Үлзытэ нютагтаа “ТОЗ” ( товарищеское обьединение земляков) 13 хүнһөө байгуулһан эдэ, 13 зоной дунда минии аба Дамдинов Дарижаб байһан. Үмсымнай нютаг – Хүндэлэн байгаа. Эндэһээ холошье бэшэ, Үлзытэ тээшээ абамнай ябадаг болоо.
Табан хушуун малнуудһаа абатамнай (угаа дамжуулһаар) хонин һүрэгөөр баян, олон хонитой, ямаагүй байгаа.
Хүгшэн аба Дэлгэрэй Дамдин, аба Дамдинай Дарижабые олон хонитой айл, эдээниие тушааха, «ябуулха» гэһэн һанаанай гарахада, нютагаархиднай ами наһыень, гэр бүлыень хамгаалһан гэлсэдэг. Абамнай баяр баясхаланиие үтэлтэрөө хүргэдэг һэн даа. “Нэгэшье үдэр хүниие зараагүй, өөһэдөө амандаа эдихэеэ гамнажа тэжээһэн” гэжэ халаглаа гэхэ.
Батын Һама эжымнай хурьгадай нюдөө үбдэхэдэ, сагаан саахар амандаа хээд, хайлуулаад, хурьгадаа тэбэржэ, нюдэнүүд соонь дуһаадаг һэн. Хурьгадай нюдэд хоноод байхадаа, һайн болодог һэн. Гайхахаар. Энээн тухай мүнөө үедэ ветврачһаа һурахаяа мартадагби.
Мүнөө хүдөө нютагуудаар хонин һүрэг түрэжэ, түлөө тэнжээжэ байгаа ёһотой. Иигэжэ бодожо үзөөд, энээниие монголһоо буряад хэлэндэ оршуулааб.
Хониной дуун
Хадын саһан хайланал даа.
Хабсал сайраар урданал даа.
Хариин шубуун ерэнэл даа.
Хажуудашни юуншни хэбтэхэб даа.
Тойг
тойг
тойг
тойг.
Урин дулаан болонол даа.
Ургаса ногоон дэлгэрнэл даа.
Уһанай шубууд ерэнэл даа.
Уурагшни дэлбэрнэл даа.
Урдаһаашни юуншни угтахаб даа.
Тойг
тойг
тойг
тойг.
Хүхэ ногоон урганал даа.
Хүбшын модон набшаһалнал даа.
Хүхы шубуун донгодонол даа.
Хүхэншни дэлбэрнэл даа.
Тэрээнииешни юуншни хүхэхэб даа!
Тойг
тойг
тойг
тойг.
Дэлбэн сэсэг урганал даа.
Дэлхэйн шэмэг болонол даа.
Дэлгэр шубуун ерэнэл даа.
Дэлэншни дэлбэрнэл даа.
Тэрээнииешни юуншни хүхэхэб даа.
Тойг
тойг
тойг
тойг.
Иимэ хониной дууе Монголдо дууладаг байгаа. Ага нютагта нэгэ бага ондоошог. Эжымнай иимэ удхатай “Хониной дуу” хурьгаяа голоод, хооллуулха дурагүй байхадань дуулажа, хонин малшье һаа, сэдьхэлынь хүдэлжэ, байн- байн хурьгаяа хооллуулжа, дүтэ болодог байгаа ха. Хонишод мүнөө үе сагта иимэ дуу дууладаг байна гү..?
Хүдөө нютагуудаар ондоо шэнэ үүлтэрэй хонин һүрэг асаржа, элдэб нэрэтэй болодог байна. Һайн үүлтэрэй мал болоо һаа, ехэл олзотой байха ёһотой.
Бага ябахадаа, эжыдээ хониной нооһо сэбэрлэжэ, угаахыень бэлэн болгожо үгэдэг һэмди. Тиигээд үдэшэ, эдеэнэй һүүлээр, нооһоёо ээрэжэ, оймһонһоо эхилээд, дулаан хубсаһа хунар бүтээдэг байһан даа. Яһала хониной нооһо ээрэһэн хүн ябанаб. Оймһо оёдог ябаалди даа, абын басагад бултадаа.
Дулма Дарижапова, доцент, арадай гэгээрэлэй эрхим.