![](/upload/iblock/9dd/9dd010dc7d452879f8275677e9a9b199.jpg)
Бимба Балбаров хадаа Шэтын можын, Агын аймагай Гүнэй нютагта (Забайкалиин хизаар, Агын аймаг – мүнөө), хабарай наранай элшын дулааран байхада, альганай шэнээхэн үлгыдэ багтажа, 1960 ондо алтан дэлхэй дээрэ hуури бодонгууд омогтой боложо мүндэлhэн юм.
Нютагайнгаа дунда hургуули 1977 ондо эрхимээр дүүргэжэ, комсомол-залуушуулай хонин бригадада ажалай харгыда гараба. 1978 оной хабар сэрэгэй албанда татагдажа, 2 жэлэй туршада Совет Армиин «үхэр буугай» хэшээлдэ алба хаажа ерэhэн.
1980 онhоо эхилжэ, түрэл нютагтаа уран зурааша-оформителеэр, удаань механизатораар, хонишоноор, колхозой завхозоор ба hүүлээрнь дарханай ажал эрхилhээр, тиигээд мүнөө болотор дархална.
1980-яад гаран онуудhаа түрүүшын туршалгануудые миин өөртөө бэшэжэ ябаhаар, нүхэдэйнгөө баалалтаар Агын тойрогой «Толон» сониной хуудаһануудта толилогдожо эхилээ. Мүнөөшье бага-сага шүлэгүүдээ «Толондо» эльгээhээр.
Гол түлэб шүлэгэйнь удха: түрэл нютаг, ан гүрөөл, аршаан булаг, аха дүүнэр, эхэ эсэгэеэ, байгаалияа магтан түүрээхэ дуратай. Мүнөө Улаан-Yдэ хотодо дүүнэртээ ба бусад зондошье дарханай туhаламжа хэжэ ябана. Бага-сага зураха дуратай, багаhаа хойшо hургуулидаа ханын газетэ шэмэглэдэг, сэрэгэй албанда байхадаашье, зуражал ябаhан. Ханза-хайрсаг гоёохо, табан хушуун мал зураглаха дуратай.
Бадмажаб Гындынцыренов.
Тэмүүжин баатарта
Уужам талын уняар
манан соо
Тэниимэ ута зэрэлгээтэhэн
хаяада,
Холын элинсэгhээ дурсагдан
толоржо,
Харагдана аалам
Чингисэй hүлдэ?
Угаа бариhан
элинсэгэй hүлдэнь
Уняартаhан номин уула
хизаартаа,
Урдын соёлойнгоо
утахан жолоое
Yндэhэн арадтаа
дамжуулан золгоо.
Түрэhэн эжынгээ
hүмбэйгөөр тэнжэhэн
Талын «бүргэд»
далижан хүдэржөө,
Түүхын туг дээгүүр
тогтооhон
Тэмүүжин баатар түбидөө
алдаршаа.
Наhанай утын дабаанай
энгэртэ
Нам hуугаагүй бэлигтэй эхэ,
Нарай үхинөө,
хүбүүдээ энхэрэн,
Нашан Заяата Заншалаа
удхалаал.
Хэтын сагуудай эртын
абдарhаа
Хэдыдэш замхаагүй
дүхэригэй эрьесэ,
Аха дүүнэр, арадай түүхэhээ
Алтан дэлхэймнай
hуладаагүй эршэ!
Ономни
Магнай дээрээ саhатай
Мунхан үндэр хабсагайтайш,
Молор уулын хормойhоо
Мэлмэржэ харьялhан
эхитэйш.
Амин ашата жаргалым
Арюун булагаар сүршэнэш,
Алтарма дайдым уhалан,
Арал, олтирогоо шэмэглэнэш.
Хүхэ торгон тэрлигтэй
Хүхюу булгин урданаш,
Хатан эжы Ономни,
Хайшаа эршэдэн яаранаш?
Гэгээн сэнхир огторгой
Гансал тэрээхэн нэрыеш
Гуниглан хаража дурсана
Гүн урасхалтай оёорыш.
Залуур hайхан орондол
Замайнгаа Зай гаталнаш,
Зүрхэн соохи ошондол
Заяата hудал хүгжөөнэш.
Эршэ хүсэтэй урасхалаа
Эрид зоригтой заланаш,
Эрхэ наhыем золголсон
Эхым мүнхэрүүлэн
hануулнаш.