![](/upload/iblock/393/393b22d78329641ddc2d624af47b00a7.jpg)
Бато Базарониие анха түрүүн би 1950 оной намар хараһанби. Бато Базарон угаа шогууша хүн байгаа. Тэрэл 1950 ондо ерэхэдээ, таниха хүнүүдээ доро дохин мэндэшэлжэ байгаа бэлэй. Тиихэдэ дүтэ таниха хүнүүдэйнь гар барихадаа, нэгэ оньһотойхон шог хэлэхыень гайхан анхараа һэм. «Иимэ үндэр томо хүн аад, гартнай яаһан туранхай, яhархаг гээшэ ааб? - гэжэ Чимит Цыдендамбаевта хэлээ агша hэн. - Басагадай гар удаахан бариха юм гээшэ ааб даа...».
Уран зохёолшоднай халта забдатай болоходоо, дүтын нютагууд руу агнуурида гарадаг һааб даа. Шубуу агнахаяа. Һүүлдэнь энеэдэтэй ушарнууд тухай шог хөөрөөнүүд тарадаг hэн бэзэ. Тиимэ хөөрөөнүүдые Бато Базарон угаа зохидоор найруулаад, элдэб согсолборинууд соо оруулдаг байгаа. Тиимэ ушарнууд тухай Бато Базароной прозоор бэшэhэн ном соо уншажа, эгшэтэрээ энеэhэнээ мартагшагүйб. Илангаяа «Мүргэдэг буха» гэһэн рассказынь ехэл hонин. Хоца Намсараев, суута уран зурааша Цыренжап Сампилов болон бусад нүхэд агнахаяа Оронго нютаг руу ошоод, тон энеэдэтэй үйлэдэ ороһон байгаа. Машинынгаа ойро тэдэнэй зогсожо байтар, ууртай бүрхирhэн нэгэ буха ерэбэ ха. Зуралгынгаа зэр зэбсэгhээ hаладаггүй Цыренжап Сампилов дүтын бургааhа руу гүйжэ ороод, фото-зураг буулгаһан мэтээр бүхы үйлэ ушарнуудые хойно хойноhоонь зуража мэдэбэ ааб даа. Үшөө нэгэ нүхэрынь машина соогоо хорошобо. Буха хоргодожо үрдеэгүй Хоца Намсараевые мүргэхэеэ сэхэ ерэбэ ха. Түрүүшээр машинаяа тойрон «эрьюусэлдэбэ». Тиигээд нуур тээшэ гүйшэбэ, буха - хойноһоонь. Тиигэжэ байтарнь бухын эзэн эхэнэр ерэжэ, тэрэнээ туужа абаашаһан байгаа.
- Энэ иихэдээ ямар эшхэбтэр, зүдэг юумэндэ оробо гээшэбди, нүхэд, энээн тухайдаа нэгэшье хүндэ бү хэлүүжэбдеэ даа, - гэлдээд, хотоёо бусаа hэн бэзэ.
Теэд... Хүхюу шогтой уран зураашань зурагуудаа хүндэ харуулжа: «Энэ Хусын ушаралта ябадалнууд гээшэ» гэжэ хөөрөөд, нюусань нюрганай забһараар гарашаһан түүхэтэй.
Бато Базароной үгэ хэлэн шогтой, хурса байгаа гэжэ дахин онсолоё. Жэшээнь, 1963 оной мартын hүүл багта, hургуулиин хабарай амаралта соогуур hэн. Би Иисэнгын hургуулида завуч байгааб. Н.С. Хрущевой засаг баряад замбууржа, алибаа юумые худхуулжа, хуймуулжа байhан үе. Аймагуудые, хүдөө ажахынуудые томодхохо гэhэн Хрущевой «агууехэ шиидхэбэридэ» дайрагдаhан Яруунын, Хориин, Хэжэнгын аймагууд «нэгэдхэгдээд», одоо зүүдэнэй юумэ болоо агша hэн. Хоёр жэл соо үргэлжэлhэн тэрэ замбууралга соогуур би Иисэнгэhээ Хори хонходожо, гэгээрэлэй таhагтай хөөрэлдэжэ шадаагүй hэм.
Гэбэшье Буряадай Уран зохёолшодой холбооной үүсхэлээр зүүн аймагуудта ажаллажа байhан зохёолшодой зүблөөн Хори тосхондо зарлагдаа бэлэй даа.
Тэрэл 1963 оной зүблөөнэй тарахада, нютаг-нютаг тээшээ ошохо hанаатайнууд Хориин гудамжануудые «хэмжэжэ» ябаа hэн хабди. Тэрэ үедэ мүнөөнэйхидэл «үй түмэн» микригүүд байгаагүй, «хамартай-хамаргүй» автобусуудаа хүhэхэ хэрэг гараа hааб даа. «Сулхара-Исинга» гэhэн шэглэлээр ябадаг автобус би хүлеэжэ, намайе үдэшэхэ гэжэ уран зохёолшо хүбүүд Хориин столовын газаагуур hүндэлжэ байгаа. Тиигэжэ байтарнай, редакциhаа гараад, Бато Базарон ерэбэ.
Нэгэ мэдэхэдээ, Бато Базарон, Чимит Дарибазарон, бидэ гурбан үлэшэнхэй байбабди.
- Буряад хүбүүд иимэлта даа. Энэ поэт басагаяа үдэшэнгүй үгы болошобо, - гэжэ ахатамнай гэмэр-гутар гэхэшүү.
Чимит Дарибазарон тоомоо таhаржа, юун гэhэн байгаа юм, би балай анха- раашьегүй hэм. Бато Базарон Чимидые хажуудаа дуудажа абаашаад, юушьеб хэлэбэ. Дарибазарон хас-хас гэтэр энеэшэбэ. Бато Базарон ехэл hониноор, миhэд-миhэд гэжэ гэдэргээ хаража ябаад, редакци тээшээ ошоhон юм.
- Юун гэлсээд, иимэ хүхюугээр эльгэ хатабаш? - гэжэ Чимидhээ асуухадам:
- Ахатамнай юун гээ гэжэ hананаш? - гэжэ асууба.
- Юун гээ юм? - гэжэ hурабаб.
- Зүб ааб даа. Залуу эхэнэрэй хажууда намайгаа хүхэрүүлэн алдабаш даа. Тиигэншьегүй яаха hэмши даа. Шимни даритаяа зандаа Базарон ха юмши даа. Харин бишни дарияа hалаhан Базарон ха юм биб даа гээл, - гээд, Чимит дахин эльгэ хатаба.
Тиихэдэнь хүнэй обогые хэрэглэжэ, энеэдэ гаргахадаа, Бато Базаровичнай гайтайл байна гэжэ hанагдаа hэн.
Бүри залуу ябаха сагтамнай «Байгал» зочид буудалай нэгэ номер соо Бато Базарон тогтоһон байгаа. Тэрэ ушарые мэдээд, Чимит Цыдендамбаев гүйжэ ерэбэ ха. Бато Базаровичай Хориин ШКМ-дэ багшалһан үедэ Чимит Цыдендамбаев тэндэ һураһан, шабинь байгаа.
Багшатаяа уулзахадаа, Чимит ахатан доброосолоо ха:
- Самолёдоор ерээгта, самолёдоор? Хэжэнгээрхид газараар ябахаяа болинтоо гэжэ дуулаа hэм. Зай, хөөрыт даа, самолёдоор ниидэхэдэ, ямар байнаб даа-аа?
Бато Базарон шабиингаа урдаһаа хурсаар шэртээд:
- Ямаршьегүйл даа. Хэжэнгэhээ тээ баруулжаа, далаад модоной зайда хүрөөд ябатараа, досоом аргагүй ехээр худхаад, муу болоод, доошонь ехэ гэгшээр... гаргажархёо hэм даа, - гэхэдэнь, Чимит ахатан абяагаа хуряагаад, түргэн гаража ябашаhан байдаг.
Харин «Хэжэнгэһээ баруулжаа далаад модоной зай» гээшэнь Чимит Цыдендамбаевай түрэhэн нютаг Тарбагатай байhан байгаа.
Аха үеымнай зохёолшод мэндэнүүд ябахадаа, барhад, иигэжэ бэе бэеэ ёгтолжо, наадалжа, угаа хүхюутэйнүүд бэлэй даа.
Хоридо болоhон уулзалга hүүлшымнай байгаал даа. Удангүй Б.Б. Базарон хэтынгээ орондо мордоһон юм.
Бато Базароной хурса хара нюдэнүүд аяар тэрэ хүртэшэгүй холоhоо шогтой хүхюунээр шэртэжэ байһаншуу...
Цырен-Дулма Дондогой,
Туяна САМБЯЛОВА бэлдэбэ.