![](/upload/iblock/14d/14d1c532dfc96e4bdb5c27120b645f4c.jpg)
Эртэ урда сагһаа хойшо эжы, абымнай үргэжэ, шүтэжэ байдаг Баян-Тугадай үбэрөөр хабтайhан, хадаhаа бууhан Халюутын аршаанай урдуур жэрын һууһан үни caгhaa Буряадта алдаршаhан Ивалгын аймаг - манай түрэhэн тоонто юм.
Хамар Дабаан хаяатай,
Хамаг зондоо хэшэгтэй,
Халюутын аршанһаа сэржэмтэй
Хамба Итигеловэй тоонтотойбди.
Үндэhэн арадайнгаа түүхэhээ
Манай Ивалгын аймаг баян намтар, түүхэтэй. Эхирэд-булгадай угай зоной (6 отог) Байгал далайн урда бэеhээ нүүн ерэжэ, Ивалга нютагта түбхинэhөөрнь, хэдэн зуун жэл үнгэрөө.
Ябалга гэжэ үгэhөө Ивалга гэжэ нэрэ мүндэлөө hэн гэдэг.
6 отог гэхэдэ - харанууд, баабай, готол, олзон, алагүй, хурамша, буумал, шоно.
Ивалгын аймаг 1939 оной августын 25-да мүндэлhэн намтартай. 6 хүдөөгэй захиргаан аймагаймнай тоодо ородог: Оронгын, Доодо-Ивалгын, Гүрэльбын, Сотниковой, Гэльбэрын ба Ивалгын.
Тахилгата газарнууд
Ивалгын дасан ошожо, Хамба-лама Даша-Доржо Итигеловэй мүнхэ бэе хаража байдаг дасанай унзад Бимба ламатай уулзалга хэжэ, нютагайнгаа тахилгата газарнууд, шажан мүргэл, Ивалгын дасан тухай мэдэсэеэ улам гүнзэгы болгобобди.
Урданай буряадууд, манай элинсэг хулинсагууд, ёhо гурим, заншалаа нарин нангинаар сахижа, мүргэлтэй хада, уулануудаа тахижа ябадаг hайхан заншалтай байгаа. Манай Ивалгын аймагта иимэ нангин тахилгатай газарнууд гэхэдэ:
* Чингис хаанай обоо (Оронго голой эхиндэ, Хамар-Дабаанай оройдо);
* 12-дугаар Хамба-лама ДашаДоржо Итигеловэй субарга (Оронго hууринда);
* Шэнэhэтын обоо (Гэльбэрэ hууринда);
* Обоо «Баян-Тугад» (Ивалгада);
* «Бугата хүшөө» (Табхарта).
Дэлхэйдэ мэдээжэ болоhон археологическа хүшөөнүүд манай аймагта баhал олон: тэдэнэй нэгэн - «Гуннское городище».
Хэрбээ хүн бүхэнэй бүхы сэдьхэлээрээ бурхан шажандаа hүзэглэжэ ябаа һаань, алтан дэлхэймнай ариг сэбэр байха hэн.
Буряад Республикын омогорхол - Ивалгын дасан баhал манай аймагай дэбисхэр дээрэ Улаан-Үдэhээ 30-аад модоной газарта Хамар-Дабаанай хойморто оршоно.
Буряад орондо бууhан хамаг айлшадые Ивалгын дасанда оруулжа харуулдаг hайхан заншалтайбди.
Бимба ламын хөөрөөнһөө: «Оронгын дархашуул гансашье нютагайнгаа Янгаажан, Ивалгын дасануудые бэшэ, бүхы Буряадай, Санкт-Петербургын, Монголойшье дасануудые барилсажа, уран шэмэглэлыень сүм бүтээлсэдэг байгаа».
Урасхал сэлгеэн аршаанууд
Манай аймагай дэбисхэр дээрэ бэе махабадаа аргалха хүйтэншье, халууншье аршаан олон даа!
Халюутын аршаан
Ивалга тосхонһоо баруун хойшоо Халюута горхоной зүүн эрьедэ гаража байдаг хүйтэн аршаан. Үе мүсын, мэдэрэлэй үбшэнүүдтэ туhатай, дээрэhээ соргоор буужа байhан аршаан доро орожо, бэеэ сохюулдаг.
Ута-Булагай аршаан
Оронго тосхонһоо хойшоо холо бэшэхэнэ гаража байдаг хэдэн эхитэй хүйтэн аршаан.
Этигэлэй хамбын аршаан
Оронго шадарай Улзын добо hууринда оршодог. Энэ аршаан хадаа элдэб олон янзын үбшэндэ туhатай юм. Хэдэн зуугаад хүн зон энэ аршаанhаа хүртэжэ, элүүр энхэ ябанал даа.
Манай hургуулиин үхибүүдэй эгээл дуратай «Туяа» лагерь баhал Ивалгын газар дээрэ - Хүхэдэй нуурай эрьедэ байдаг. Эндэ жэл бүри манай hургуулиин үхибүүд амардаг.
Шэнэhэтэ баабайhаа холо бэшэ шубуудай заказник оршодог. Гэльбэрын дунда hургуулиин үхибүүд эндэ хомор болошоhон шубуудые шэнжэлжэ, эрдэмэй ажал ябуулжа байдаг.
Алдар суута хүнүүд
Энэ ехэ ажал ябуулхадаа, домог түүхэ, уһа гол, ёһо заншал, солото хүнүүд тухай мэдэжэ абабабди.
1. Эрдэмтэ ламанар: Хамба лама Даша-Доржо Итигелов, Санжи-Цыбик Цыбиков.
2. Уран зохёолшод: Бабасан Абидуев, Намжил Балдано, Алексей Бадаев, Чимит-Цырен Санжиев.
3. Композиторнууд: Анатолий Андреев, Гур Дашапылов.
4. Артистнууд: Юрий Муруев, Сурена Дашицыренова, Жаргал Бадмацыренов, Зоригто Тогочиев.
5. Уран зураашад: Галдан Ленхобоев, Эрдэни Цыденов, Доржи Пурбуев.
6. Тамиршад: Борис Зоригтуев, Баир Омоктуев.
Лицей-hургуулидаа нютагайнгаа солото хүнүүдээр уулзалгануудые үнгэргэдэгбди.
Тобшолол
Түрэл нютаг Ивалгамнай ямар баян түүхэтэй, удхатай, һайхан заншалтай гээшэб даа. Ямаршье аймагуудhаа дутуугүй, үзэсхэлэн гоё байгаалитай, аршаан булагтай газарта оршодог hайхан нютагтайбди.
Дарима ЦЫРЕНЖАПОВА, Үндэһэтэнэй 1-дэхи лицей-интернадай һурагша.